Коронавирусот,  односно болеста позната како Ковид -19 е застрашувачки потсетник за непосредните глобални закани какви што се заразните болести. Епидемии се случувале во текот на целата историја на човештвото, само во последниве 20 години коронавирусите предизвикале три поголеми во светски рамки. А, изминатава година кошмарот на невидливата закана интензивно ја доживеавме во реално време и од прва рака, на глобално ниво. Она што загрижува е тоа што паузата помеѓу две глобални пандемии станува сè пократка.

Но, како сè започна, како ескалираше и се гледа ли крајот на оваа закана? По една година веќе можеме да погледнеме наназад, да повлечеме една замислена линија и да го исцртаме костурот на развој на чудовиштето наречено ковид по месеци. Секако, на крајот ќе се обидеме да проектираме и како сè може да заврши.