Најраширениот инсект во светот, а најверојатно и најомразениот е бубашвабата. Овие инсекти настанале пред околу 300 милиони години и денес се познати околу 3.500 вида. На пример, во САД се познати 55 вида. Верни сопатници на човекот низ вековите, му ја користат и загадуваат храната, го вознемируваат преку ноќ, со омраза ги гледа како претрчуваат брзо преку собите кога ќе ја запали светилката. Се јавуваат во голем број преку лето, излегуваат од каналите, отворите за вентилација, се шетаат меѓу убаво измиените садови, се кријат во корпите за леб. Со доаѓање на зимата ги снемува и токму кога ќе помислите дека сме ги уништиле, тие се појавуваат повторно и сè започнува од почеток.