Изгледа неверојатно, барем за мене, но ете изминаа 25 години од излегувањето на првиот број на ЕМИТЕР, на денешен ден, во август 1995 година. Но приказната за ЕМИТЕР е започната барем десетина години порано, кога како ученик редовно ги читав југословенските списанија „Техничке новине“, „САМ свој мајстор“, „Радиоаматер“ и „Галаксија“, а потоа, како студент и британскиот „Elektor“ и многу други научно-популарни списанија во Американскиот и Францускиот културен центар. Некаде тогаш е зачетокот на идејата за наше, македонско научно-популарно и техничко списание.
Идејата почна да се конкретизира пролетта 1995 година, со ставање на хартија на првичниот концепт и со разговори со многу колеги, инженери и љубители на науката и техниката. Полека се формираше и екипата која со свои написи ќе ја преточи таа идеја во стварност. Но ништо не одеше мазно. Недостасуваа пари, простор, стручни соработници. Тие проблеми се решаваа во од. Не нè поколеба ни тоа што од нечие невнимание и неодговорност пропадна веќе половина подготвен број и се направи застој од 20 дена. На крајот, со огромни напори на Сашо Бојчин, во улога на прв графички уредник, ЕМИТЕР број 1 беше подготвен и даден на печатење. Ако добро се сеќавам, отпечатените списанија ги зедовме од печатницата на 20 август, а на 21 август првиот број веќе беше во трафиките, но можно е во датумиве да имам грешка од ±1 ден ☺
Како и да е, ЕМИТЕР тогаш почна да емитува и еве, со разни подеми, падови и промени, тоа го правиме веќе 25 години, со што сме едно од ретките македонски списанија со толкав стаж. Ваквите јубилеи вообичаено се користат за да се даде кратка хронологија на настаните, па тоа ќе го сторам и јас во оваа пригода. Но наместо да пишувам старо-нов текст, ќе ги посочам клучните настани од развојот на ЕМИТЕР преку неколку од тогашните уводници.
Подготовката на првиот број на ЕМИТЕР (1995) и Сашо Бојчин пред ѕидот насловните од дотогаш издадените броеви на списанието во чијшто зачеток учествуваше и тој како прв графички уредник (1999)
ЕМИТЕР станува добитник на Сребрен медал на МАКИНОВА (1998) и на Златна плакета на Скопски Саем (1999)
- Емитер 1/1995 – ЕМИТЕР започнува со своето емитување
- Емитер 7-8/1996 – Конкурс за проекти, анкета и писма
- Емитер 11/1999 – Брошури во издание на EМИТЕР
- Емитер 7-8/2000 – Крај или нов почеток за ЕМИТЕР?
- Емитер 1/2002 – ЕМИТЕР повторно со вас
- Емитер 9/2003 – Електроничарите и ЕМИТЕР
- Емитер 7-8/2005 – 10 години ЕМИТЕР
- Емитер 9/2006 – ЕМИТЕР во училиштата
- Емитер 10/2007 – ЕУРЕКА, нова рубрика во ЕМИТЕР
- Емитер 11/2009 – ЕМИТЕР на Интернет!
- Емитер 7-8/2010 – 15 години ЕМИТЕР
- Емитер 9-10/2016 – Повторно заедно!
- Емитер 10-12/2018 – ЕМИТЕР повторно со печатено издание
- Емитер 7-12/2019 – Групна претплата на ЕМИТЕР за училишта и факултети
Само накратко: со многу напори и пожртвувана работа успеваме веќе 25 години да го издаваме првото и единствено македонско научно-популарно списание, и покрај тоталната незаинтересираност на државните институции да му помогнат на ЕМИТЕР (иако врши важна образовна функција!), многу слабата заинтересираност на фирмите за нивно рекламирање во ЕМИТЕР и, за жал, недоволно бројната публика искрено заинтересирана за науката, техниката и за самоградителството. Во потопот на вистинските вредности, предизвикан од напливот на сензационалистички, шпекулативни и длабоко ненаучни медиуми, сепак не се откажуваме од нашата мисија да ги приближиме науката и техниката до пошироката публика.
Од промоцијата на првата книга во издание на ЕМИТЕР, Обработка на аудиосигналот (1999)
Новиот број на ЕМИТЕР доцни поради општопознатата ситуација со Корона вирусот, но веќе сме при крај со неговата изработка и веруваме дека наскоро ќе пристигне во вашите раце.
П.С. Првиот број на ЕМИТЕР можете да го разгледате во видеото подолу и на страницата за ЕМИТЕР 1/1995 на нашиот портал. Печатените примероци од овој број се распродадени одамна, но специјално за оваа пригода, подготвивме електронско издание како подарок за сите верни читатели што го пропуштиле. Можете да го прочитате (до крајот на годинава) како додаток на бесплатниот промотивен број тука.
Се прашуваме колкумина ги имаат сите (или повеќето) броеви и можат да ги покажат со фотографија?
Насловната страница на првиот број од списанието ЕМИТЕР
ЕМИТЕР станува добитник на Златната плакета на Скопски Саем (1999)
Со првиот број на ЕМИТЕР во рака конечно на заслужен одмор (август, 1995 година)
Од промоцијата на првата книга во издание на ЕМИТЕР, Обработка на аудиосигналот (1999)
Од промоцијата на првата книга во издание на ЕМИТЕР, Обработка на аудиосигналот (1999)
ЕМИТЕР станува добитник на Сребрен медал на Макинова (1998)
Уредникот и графичкиот дизајнер при подготовка на првиот број на Емитер
Првиот графички уредник на ЕМИТЕР во првата редакциска канцеларија на списанието
Планот за распоред на содржините за првиот број на ЕМИТЕР
Скица за насловната страница на првиот број
Скици за распоред на содржината и податоците од импресумот на пробниот отпелаток
Страници од пробниот, работниот отпечаток на списанието
Првиот отпечатен примерок на списанието ЕМИТЕР, прв примерок што беше подигнат од печатницата
Првата екипа на Емитер
