Денешните 1 293 се петтиот најголем број на новодијагностицирани лица од почетокот на епидемијата до денес, а четвртиот бран е сè уште далеку од својот пик. Репродукцискиот број Rt не е многу висок – точно е во границите на предвидувањата – но бидејќи стартувавме со високи 300 случаи на ден, со малку чекори (сериски интервали од 4 дена) стигнавме до тука. Ќе бев изненаден од бројките доколку во неделата вечер не ги видов колоните од паркирани возила во мојата улица и насекаде низ градот. Луѓето масовно одеа во посети за Поклади-прочка, заборавајќи дека се наоѓаме среде епидемиски бран. Знаејќи дека британскиот сој на вирусот има пократко време на инкубација, денешните високи бројки точно го одразуваат неделниот високоризичен настан.