Почитуван ЕМИТЕР,
Не можам да си објаснам како луѓето можат да им веруваат на глупави и лажни научни "факти". Не можам ни да си објаснам како можат да шират лажни научни "факти".
За пример да го земеме г. Стојмир Симјаноски. Толку многу се револтирам кога ги читам неговите тврдења во рубриката "На граница на науката", што не можам да не се прашам самиот себеси некои прашања. Го истрпив кога кажуваше смешни работи во серијалот за НЛО, но сега пак почна да изнесува смешни работи во серијалот "Апокалипса 2012". Натчовечки способности на Маите, чуда невидени кај Маите, генетски модифицирани, Маите сите биле исти... ГЛУПОСТИ. Дали е свесен што кажува и што изнесува како информација? Дали е свесен какви глупости изнесува? Тука е господин Владимир Филевски да го освести, да, но што ако господин Симјаноски му ја наполни главата со глупости на некој човек кога во близина нема да биде господин Филевски за да го освести слушателот?
Кога бев мал го гледав господинот Симјаноски на МТВ1 како кажува за средби со НЛО над тлото на Македонија. Го слушав со подзината уста и ме натера да поверувам дека навистина вонземјани иделе на Земјата и им се рушеле чиниите на Земјата. Сега кога пораснав, кога дипломирав и кога сфатив дека нема такви глупости како што тврдеше господинот, сфатив дека залудно сум си го потрошил времето во собирање информации за НЛО и сфатив дека тоа е една лага. Затоа, му препорачувам на господинот Симјаноски да не си го губи времето барајќи информации за лаги и измислици.
Што се однесува за НЛО, мојот став е дека некаде таму, многу многу далеку од нас можеби живее некој, некаква форма на живот, но сум апсолутно, АПСОЛУТНО сигурен дека ниту една летечка чинија се нема довлечкано на Земјата, за на крај да се сруши или да киднапира крави за да ги испитува. Пресигурен сум дека никакви вонземјани не се срушиле на Земјата, дека никакви одблесоци навечер или светкања не претставуваат НЛО. Светот ќе биде подобро место кога и господинот Симјаноски и останатите како него ќе се уверат дека нема ниту паднато ниту слетано НЛО на Земјата. Не може г. Симјаноски да прашува сенилни дедовци и баби во некое село, па тие да кажуват дека виделе НЛО и овој потоа цел озарен да верува дека имало НЛО. И го молам господинот Симјаноски да прекине да изнесува "факти" кои ги читал во некои "леви" книги пишувани од силно надувани квазинаучници-писатели.
За Тото, кој не се осмелувам да го наречам господин! Дали не гледа дека за науката не постои HHO, перпетуум мобиле, дали гледа дека математиката, физиката и хемијата не дозволуваат HHO-генератор? Очигледно е дека Тото е ангажиран во бизнис со HHO, па си ги штити бизнисот и сопствената лага. Само, сè додека има наивен народ, ќе се најде некој како Тото кој ќе стриже овци и ќе го лаже народот. Мојот став е дека HHO е тешка лага, а господата како Тото кои шират лаги за да заработат – треба да се казнат.
Сè додека луѓето гледаат дебилни серии кои во моментов одат на некои наши телевизии и не гледаат проверени и квалитетни документарни емисии и не читаат списанијакако ЕМИТЕР, личности како Тото и господин Симјаноски ќе можат да го лажат народот.
Искрен поздрав до редакцијата на Емитер.
Дарко Петрески, преку e-mail
Почитуван г. Петрески, Ви благодариме што ги споделивте Вашите размислувања со нас и нашите читатели. Потполно се сложуваме со Вашите критики за HHO-генераторот и неговите поддржувачи. Ви благодариме за поддршката која ни ја давате, во нашите напори научно да ги собориме заблудите во врска со HHO-генераторите. Нашите предвидувања дека ќе има бурни реакции на нашиот текст за HHO-генераторите, се остварија – на општо задоволство на сите читатели, веруваме.
Од друга страна, рубриката "На граница на науката" и дебатите во тие фељтони меѓу мене и г. Симјаноски постојат токму заради разјаснување на некои појави кои се обвиткани (заслужено или не) со превезот на мистеријата. Господинот Симјаноски располага со неверојатно многу податоци и широки познавања за сите можни појави кои се окарактеризирани како мистерии и не го поканивме случајно да учествува во фељтоните "На граница на науката". Можам да кажам дека ми е чест г. Симјаноски да ми биде опонент во овие дебати.
Веруваме дека податоците изнесени и од страна на г. Симјаноски и од моја страна им се помалку познати (или непознати) на поголемиот број читатели, па се надеваме дека нашите дебати се многу интересни и за стручната, но и за пошироката публика. Разликите во моите ставови и ставовите на г. Симјановски се всушност "зачинот" кој ги прави нашите дебати подинамични и поатрактивни, а сведоци сме дека тие наши дебати продолжуваат и подоцна, не само во круговите на нашите читатели, туку и многу пошироко во нивното друштво. Тоа ни укажува дека концептот на нашите фељтони е исправен, а доказ за тоа е и Вашето писмо. Ви се заблагодаруваме уште еднаш и се надеваме дека во ЕМИТЕР и понатаму ќе наоѓате теми за кои вреди да се има "борба" на мислења.
Владимир Филевски
Здраво,
Сакам да го направам универзалниот тајмер (од ЕМИТЕР бр. 7-8/05 стр.86-89). Во списанието видов пример за пресметка за време од 10 секунди. Јас сакам тајмерот да ми работи за време од 1 час и пресметав дека 1час=3600 s, значи T=3600 s, f=0,00027Hz, што дава fosc=18,2 Hz (со делител 65536). Но во текстот пишува дека fosc треба да е поголемо од 1 kHz, а помало од 100 kHz. Дали овој тајмер има можност да работи со време од 1 час, или 3600 секунди, и како?
Благодарам однапред,
Мартин од Битола
Пресметката е точна, но проблем е што fosc=18,2 Hz, што е многу помалку од 1 kHz. Според упатството во текстот, fosc треба да биде поголемо од 1kHz. Овој услов не е исполнет, па затоа тајмерот нема да работи добро. Доколку сакате да добиете промена на излезот по 1h треба да додадете дополнителен делител со фактор Ndop. Тогаш пресметката ќе биде:
fosc=(2N•2Ndop)/T = (65536*64)/3600 = 1165,1 Hz
Сепак, и да ја направите оваа корекција, тајмерот нема да работи добро затоа што е многу тешко да ја нагодите фреквенцијата да биде точно 1165,1Hz и не постои начин да биде стабилна во текот на мерениот период кој е многу долг за употреба на RC-осцилатор. Оваа нестабилност не е толку проблематична, кога се мерат мали времиња како наведените во проектот, затоа што отстапување од 20% значи разлика од 2 секунди, но 20% од еден час е веќе голема разлика. Затоа, ако сакате да мерите долги времиња, тогаш ќе ви треба кварцен осцилатор кој има поголема стабилност. Доколку Ви треба голема стабилност, тогаш треба да набавите температурно стабилизиран кварцен кристал.
Благој Ќупев
Времето кое Ви е потребно можат да го постигнат тајмерите за кои имавме објавено проекти во броевите 3/2000 и 9/2008. Погледнете ги и тие проекти, па одлучете кој од нив Ви одговара повеќе.
Слободан Таневски
Здраво почитувана редакцијо,
Ви пишувам во врска со 150W-ниот транзисторски аудиозасилувач со комплементарен Дарлингтон транзисторски пар TIP142 и TIP147, проект објавен во Емитер 10/2005.
Проблемот со мојот засилувач е во тоа што на својот излез дава 45Vdc. Мислам дека проблемот е во транзисторот T3 (TIP41) кој не можев да го најдам, па наместо него ја вградив неговата замена BD243C. Сакам да прашам дали проблемот е до него или да го барам проблемот на друго место? Ако случајно знаете во што може да биде проблемот, ве молам да ми помогнете.
Однапред благодарам и поздрав.
Иван Илиев, преку е-пошта
Бидејќи се работи за релативно едноставен аудиозасилувач, затоа и проблемот може да се реши многу брзо. Вие не наведувате дали напонот на излез има позитивен или од негативен предзнак, но како и да е, на излезот од вашиот засилувач се јавува напонот од позитивната или негативната гранка од напојувањето. За вакво нешто не може да биде одговорна употребената замена за T3 бидејќи BD243C е соодветна замена за TIP41. Причината за појавата на напонот за напојување на излезниот приклучок може да биде банална, од краток спој на плочката до погрешна монтажа или неисправност на некоја компонента, особено на некој од транзисторите. Тука посебно би ги посочил транзисторите во диферанцијалниот засилувач (степен) кој од повеќето функции кои ги извршува има и задача излезниот DC-offset напон на излезот да го држи на нула.
Во секој случај, прво проучете го добро принципот на работа на засилувачот, како и текстот во рамката "Информации и упатства за електроничарите". Потоа внимателно проверете дали на плочката има некој краток спој, прекин или погрешно поставена компонента, како и дали транзисторите T3, T4 и T5 се прописно изолирани од ладилникот на кој се монтирани. Ако вака не ја најдете грешката, тогаш проверете ја исправноста на транзисторите, а бидејќи транзисторите T1 и T2 (BC556) не чинат многу пари, можете и веднаш да ги замените со нови. Ако и понатаму засилувачот се однесува исто, проверете го напонот на Зенер диодата ZD1 кон маса – тој треба да биде околу 12V, па ако не е, заменете ја со нова. Исто така, проверете ги тримерот P1 и другите отпорници дали се со препорачаните вредности. По овие проверки и поправки, сигурно засилувачот ќе проработи, па ќе треба само да извршите нагодување на DC-offset напонот на излез на засилувачот, како што е наведено во проектот.
За крај, моја препорака: наместо трите диоди D1, D2 и D3 ставете само две поврзани во серија, отпорникот R7 заменете го со вредност од 27kΩ, а отпорникот R6 со 1kΩ.
Славко Стојковски
Почитувани,
Имам прашање за вашиот соработник Денис Галовски. Во одговорите на писмата до редакцијата, во бројот 1/12 имате спомнато дека може WoL да се изведе со рутерот linksys WRT54GL на ddwrt. Јас имам WRT54GS со ddwrt firmware и ме интересира дали може да се искористи мојот рутер за далечинско вклучување на компјутер?
Мики (mijal_jane@....)
Теоретски да..., иако никогаш немам работено со тој модел и неможам да кажам дали одредени функции работат или не, но можете да се обидете. Процедурата е следнава:
1. Во БИОС нагодувањата на Вашата плоча треба да овозможите WOL.
2. Доколку имате уште еден компјутер во локалната мрежа, да проверите дали WOL функционира локално.
3. На компјутерот од кој ќе се врши будење треба да има софтвер кој ќе испрати магични пакети до исклучениот компјутер (постојат многу бесплатни програми за таа намена, WOL freeware на google).
4. Треба да ја знаете MAC адресата од мрежната картичка од комјутерот што ќе треба да го будите. Во командниот промпт се задава команда ipconfic/all, при што ќе излезе листа со сетирања од мрежната карта. MAC адресата е дадена како Physical Address во формат XX-XX-XX-XX-XX-XX, а во програмите за будење оваа адреса се внесува како XX:XX:XX:XX:XX:XX или споено без црти или две точки).
5. Откако ќе проработи будењето во локалната мрежа треба да се сетира рутерот.
6. Наместо динамичка IP адреса треба да се избере статичка IP адреса.
7. Во менијата на рутерот треба да се види дали постои опција да се овозможи WOL.
8. Бидејќи интернет-провајдерите во Македонија доделуваат динамичка IP адреса, потребно е да се регистрирате на noip.org за кога било и каде било да ја имате информацијата за моменталната IP адреса на Вашиот рутер (односно компјутер).
9. Од кој било компјутер поврзан на интернет ја стартувате програмата за испраќање магични пакети, ја внесувате IP адресата на Вашиот рутер и MAC адресата на мрежната картичка од Вашиот комјутер.
Доколку сè е како што треба, компјутерот треба да се подигне.
Подетаљно http://www.dd-wrt.com/wiki/index.php/WOL.
Денис Галовски
Тото зошо се замараш и нервираш со емитер едноставно тужиги и ќе се докажи однеси возило со монтиран HHO во машински факултет и тие ќе докажат дали заштедува или не нема потреба нив да му носиш твое возило ако сакаат емитер да докажат дека возилото не заштедува нека си наместат во своето возило нека видат па после нека пишуваат тие се базираат на некои интернет страни во кои секој може да кажува шо сака и шо сакаат да направат водороден генератор со едно гледање на youtube па водородните генератори ги прават без неутрали или клаваат сол за електролит јас имам наместено во моето возило и зашедив 35% ама немам намера да го носам во емитер на тестирање кој шо сака да мести нека мести кој шо нејќи нека не мести нивно право јас не знам ни хемиски равенки ни по кој принцип работи само знам дека не троши колку со трошеше и прима подобро него претходно а до тото тужиги знајш дека ќе добијаш нема шо да изгубиш па после нека кажуваат колку сакаат и до емитер истакнетего текстов немој да го прикривате и поздраветеги нафтените компании кои ви имаат платено за да го објавите текстот позз
Даре, преку е-маил
Писмото од Даре го пренесуваме онакво какво што го добивме.
Одамна не сме виделе ваква неписменост: ниту една запирка, ниту една точка, ниту една голема буква на почеток од реченица – не се знае која реченица каде завршува, ниту каде почнува нова! Навистина е тешко од вакво писмо да се разбере "што сака да каже писателот". Но, некако успеавме да дешифрираме дека во последниот дел од писмото се обраќа и до ЕМИТЕР – да не го прикриваме неговото писмо. Е па еве – не го прикриваме, го отпечативме!
Владимир Филевски
(неплатен од нафтените компании – за жал!)
Доколку HHO генераторот заштедуваше гориво, одамна овластените институции задолжени за издавање официјални сертификати тоа ќе го потврдеа со сертификат. Впрочем, секој што сака да прави бизнис со некоја иновација, прво што треба да направи е да обезбеди официјален сертификат како потврда на придобивките кои ќе ги донесе неговиот уред. И тоа е основниот документ со кој се потврдува дека потрошувачите нема да бидат измамени, т.е. може уредот слободно да се рекламира и да се прави регуларна маркетинг-кампања. Зошто, во ниту една држава во светот, не е издаден ваков сертификат покажавме во написите посветени на оваа тема.
Томе Скендеровски
Почитуван Емитер,
Не се работи за тоа дали HHO генераторите се вистина или лага. Тоа е голема тема. Се работи за тоа – на основа на што Вие како списание дојдовте до заклучок дека е лага, ако во истиот напис барате некој што го има инсталирано да го отстапи возилото за вие да го тестирате?! Па, вие ако сте фирма, купете еден HHO генератор, ги има милион на ebay, или направете еден од инокс, веројатно познавате некој што може да ви добави, направете пулсен модулатор, електроника и испробајте го. Па играјте си малку со електролитите, тестирајте ќелии, квалитет на челик. Ако знаете воопшто за што зборувам?
Дали некој ќе ви верува или не, тоа зависи од многу нешта, а највеќе од компетентноста што сте ја стекнале во вашето досегашно искуство. Но се порекнувате самите себеси кога нешто тврдите, а немате доказ, ниту за едното ниту за другото. Како можете да тврдите дека апсолутно нема заштеда, кога јас и многу луѓе сме се увериле дека има, и тоа по милион тестови. Па уште да ви го отстапиме возилото. Ма немој? Па фирма ли сте, што ли сте? Знаете ли дека во Македонија има преку 50 ентузијасти кои работат на HHO генератори, обидувајќи се самите да постигнат нешто што сите го посакуваме: заштеда на горивото, кое сите нè мачи.
Знаете ли дека го убивате и оној мал ентузијазам што останува во Македонија на иновативно поле. Пуштете ги луѓето да експериментираат, да се надеваат, па во тоа е суштината и на науката: да се најдат начини, па макар биле и промашување, од каде знаете дека некој нема да дојде до идеално решение? Го тврдите тоа? Со кое искуство во HHO генераторите, ве молам, а не сте виделе во животот исти таков? ВИЕ тврдите дека нешто е штетно, а немате 100-200 евра да го направите сами?? Има многу лоши изработки на HHO генератори во светот, тоа е точно, но да тврдите дека е лага е премногу храбро. Вие, како списание за популаризација на науката, мислите дека излегувате ПРОФЕСИОНАЛНИ што сега ја откривте Америка и сте чесни кон читателите што им кажувате да не даваат пари и да не губат време на HHO генератори или кои било други fuel saver-и? Па, бидете мажи, купете од сите 5-6 fuel saver системи што постојат во светот и тестирајте ги и просветлете нè со знаење. Само, тоа не можете да го направите затоа што немаме ни институција во државава што тоа може да го измери. Но, затоа ВИЕ тврдите… Многу јако.
Па како тоа ВИЕ ја популаризирате науката?? Наместо да направите тестирања самите, па да ни ги покажете тестовите, какви и да се тие, вие ја правите најголемата грешка што некој може да ја направи: тврдите дека ЗНАЕТЕ! А самите знаете дека човек е правилен сè додека учи, се развива, сè додека кажува дека не знае доволно, дека има уште многу да учи. Професори од факултети и доктори не тврдат дека знаат сè, а вие знаете дека е лага. Браво. Ако вака тврдите и за други нешта, читателите ќе спознаат, а да не кажам дека излегувате смешни, особено за оние читатели кои што имаат вградено, а и за оние што повеќе од вас разбираат што е HHO генератор.
Благодарам и поздрав од HHO корисник кој има заштеда од 25%, а вие возете и понатаму и затупете ги лугето уште повеќе. Наместо да кажете дека е тоа концепт кој треба да се испитува, да извадите тестирања, очекувања, модификации од светски медиуми, вие брже-боље, го оштетувало моторот...Таа ви е добра. Затоа Toyota Clarity вози 100% на водород. Ако сте чуле воопшто. Сега добивам впечаток дека е непотребно да се елаборира со вас на оваа тема, и човек дури да се замисли дали да стапи во контакт со вас, веднаш ми паѓа темница на очи: што можам вас да ве убедам кога сè знаете?
Всушност, почитувани мои, гледам дека јас од ова пишување фајде немам, но ми се прави ќеиф некој од вас, надежни т.н. новинари за наука, да го прочита текстот, па макар ако 1% влијае на него да внимава другпат што пишува, супер, ако не, полошо за вас! Ова ми кажува уште нешто. Дека вие всушност и не сте направиле НОВИНАРСТВО на оваа тема. Нема шанси да сте разговарале барем со тројца што имаат инсталирано, и да пренесете искуства, бидејќи не би го тврделе ова. Значи вие сте препишувале ДЕКА ЗНАЕТЕ?...цццццц ...Уште полошо!
Не е битно, преку е-маил
Повторно уште едно долго писмо преполно со омаловажувања и навреди, а без ниту еден контрааргумент на нашите тези (премногу слично на писмото од "Тото" од предминатиот број на ЕМИТЕР). Уште и "потпишано" со Не е битно (кој)!? Верувајте, воопшто не ни е битно кој испратил писмо, но навистина непријатно ни е во нашиот одговор да му се обраќаме на читателот со "почитуван г. Не е битно,..." Некако смешно изгледа, нели? Но, ние тука ништо не можеме кога самиот тој си избрал така. Нејсе...
Почитуван господине Не е битно, не е битно тоа што погрешно сте чуле дека Тојота го произведува автомобилот на водороден погон Clarity (го произведува Хонда!), туку е битно тоа што не правите разлика меѓу автомобил на водороден погон и автомобил на бензиски погон со HHO генератор. А таа разлика е огромна! Автомобил на водороден погон (како што е Honda Clarity) навистина 100% вози на водород, но тој водород доаѓа од резервоар со компримиран водород кој е монтиран во самото возило. А како дошол тој водород во тој резервоар? Тој водород е произведен на друго место (а не во автомобилот!), па автомобилот мора да дојде до некоја "водородна пумпна станица" (аналогна на бензиската пумпна станица) за да го наполни својот резервоар со тој водород. Да напоменам и тоа дека автомобил на водороден погон (како Honda Clarity) има посебно конструиран мотор, приспособен токму на тој вид гориво и значително се разликува од "обичните" бензиски и дизелски мотори. Уште еднаш: кај автомобилите на водороден погон, водородот не се произведува во самиот автомобил! Зошто не се произведува во самиот автомобил? Затоа што тој водород треба да биде што поевтин, а тоа е можно само ако постапката на производство на водород се врши надвор од автомобилот, во стационарна постројка – ефикасноста на процесот на производство на водород така е многу, многу повисока.
Од друга страна, во автомобилот на бензински погон со HHO генератор, водородот се произведува директно во самиот автомобил – но многу неефикасно: преку бензиски мотор, па преку алтернатор, па преку HHO генератор. Ефикасноста на тој процес веќе ја пресметавме – таа изнесува помалку од 14%, што е катастрофално лошо! Истиов автомобил ако троши 6 литри бензин на 100 km, со вграден HHO генератор ќе троши повеќе од 6,13 литри! И тоа при претпоставена ефикасност на хидролиза во HHO генераторот од невозможни 100%!
Почитуван г. Не е битно, битно е што во Македонија постои институција со највисока можна стручност, способна да измери колку се зголемува потрошувачката на бензин кога ќе се вгради HHO генератор во автомобилот – тоа е Машинскиот факултет во Скопје. Само треба некој да го однесе таму на испитување својот автомобил со вграден HHO генератор и самиот да се увери со своите очи. Не ни паѓа на памет залудно да трошиме пари на правење или купување HHO генератор и негово тестирање, бидејќи прво – знаеме дека не штеди гориво и второ – дека господата како Тото, Не е битно и Даре веднаш ќе нè обвинат дека намерно не сме го направиле добро HHO генераторот или дека сме ги местеле резултатите. Токму затоа баравме од "најусвитените глави" да ни донесат свој автомобил со HHO генератор, па самите да се уверат во резултатите од тестот. Поканата сè уште важи!
Почитуван г. Не е битно, многу е битно да сфатите дека тие "50 ентузијасти во Македонија што работат на HHO генератор" не можат да ги соборат законите на физиката и хемијата. Тие закони милијарда пати се докажани во практиката, тие закони се практика преточена во теорија! Кутрите тие 50 "ентузијасти" по ништо не се разликуваат од другите 50 "ентузијасти" во Македонија кои работат на пронаоѓање на перпетуум мобиле.
Почитуван г. Не е битно, многу е битно да сфатите дека ефикасноста на бензискиот мотор, ефикасноста на хидролизата, енергетската вредност на бензинот и водородот, брзината на горење и уште многу други работи од физиката и хемијата не се само гола теорија, туку дека милијарда пати се докажани во практиката со тестирања. Неуките "ентузијасти" со никакви напори, колку и да се големи тие, нема да го променат тоа!
Почитуван г. Не е битно, многу е битно да сфатите дека ЕМИТЕР со секој свој напис ја популаризира науката и ги поттикнува вистинските ентузијасти-иноватори, нудејќи им огромно количество на потврдени научни сознанија и практични совети – како преку теоретско/информативните статии така и преку нашите проекти за самоградба. Ние не им даваме на ентузијастите лажна надеж дека нешто е возможно да функционира (на пример перпетуум мобиле или HHO генератор), кога тоа според сите научни сознанија (и теоретски, и практични) е невозможно. Токму со тоа што ние ќе ги разобличиме таквите заблуди (и лаги) им даваме вистински поттик на иноваторите – наместо времето и парите залудно да ги трошат на такви глупости, да ги насочат во вистинска креативна насока и да направат нешто корисно.
Почитуван г. Не е битно, многу е битно да сфатите дека науката не почнува од нас ниту, пак, од кој било иноватор или ентузијаст, па да мора сите веќе откриени работи одново да ги откриваме и практично да ги тестираме. Треба да се користат постоечките знаења и со нивна помош да се оди напред, а не да се губи време на нешто што милион пати претходно е теоретски и практично докажано. Пренесувањето на знаењата не е препишување, како што мислите Вие. ЕМИТЕР знае, постојано се усовршува, истражува, проектира, изработува прототипови и тие сознанија несебично ги споделува со своите читатели. Но од Вас и другите "HHO ентузијасти" до сега не добивме ниту едно аргументирано сознание во прилог на HHO генераторите.
Владимир Филевски,
Томе Скендеровски и Слободан Таневски
Здраво,
Се јавувам во врска со проектот "Дигитален LC метар" од Емитер бр. 5/2007 и 6/2007. Проектот го изработив, но истиот не работи добро. Фреквенцијата f1 изнесува 564 KHz, f2 изнесува 418 KHz, C4 = 1 nF и L1 = 84 µH. По притискањето на TS1 во мод L, се појавува 0,00 µH, а ако се приклучи индуктивитет, покажува многу мала вредност, пример за L = 1,5 mH покажува 0,4 µH. Во мод C по притискањето на TS1 се појавува C = 0,00, а по една до две секунди почнува да се менуваат бројки без некој ред. Ако се приклучи некој кондензатор, се појавува "over range". Обликот на осцилограмите, според сликите 7 и 8, е добар, но амплитудата е двапати поголема од таа на сликите.
Програмата за програмирање на PIC16F84 ја презедов од веб-сајтот на Емитер. Молам за совет, каде може да биде проблемот?
Подрав,
Ѓорѓи Андов
Пред да започнам со одговорот, да дадам една напомена: најголемиот дел од неуспехот при изградбата на сите електронски уреди доаѓа од недоволното обрнување внимание на содржината на текстот во која авторот сериозно се намачил да даде детално објаснување за принципот на работа, за совети и мерки за изградбата на уредот и напатствија за неговото пуштање во работа.
Грешките при мерењето на вашиот LC метар произлегуваат од неправилната основна фреквенција која кај вас изнесува 564 KHz, а за правилна и прецизна работа на уредот е потребна фреквенција од 550 000 Hz (550 KHz). Потребата за голема точност на оваа фреквенција ја потенцирав во написот во Емитер 6/2007 – на страница 53, ред 6 под Contact vendor, пишува: "....но за декларираната точност на LC метарот од 1%, потребно е основната фреквенција да биде точно или многу блиску до 550 000 Hz". Ако продолжите со читање, во текстот ќе ја забележите и оваа реченица: "Напоменувам уште еднаш, доколку се набави точна вредност од 1000 pF за калибрациониот кондензатор" (0,5%)!!!, "како и точни вредности за индуктивитетот L1 и кондензаторот C4, непријатности и нервозите околу пуштањето на LC метарот во работа ‚ Ќе бидат избегнати".
Фреквенцијата f2 или фреквенцијата на калибрација, за која вие сте измериле 418 KHz, треба да изнесува точно 394 KHz, што е уште еден податок дека кондензаторот за калибрација ја нема точната вредност од 1000 pF.
Можеби ќе се запрашате како толку мали отстапувања на фреквенциите можат да предизвикаат толкави проблеми во функционирањето? Одговорот е во принципот на работа и во самата конструкција на инструментот. Имено, уредот работи на принцип на резонанција што значи дека ако не се погодени фреквенциите, нема резонанција, и напонот драстично (експоненцијално) паѓа. Токму затоа програмата за микроконтролерот е направена така што ја блокира работата ако фреквенциите не се точни. Инаку уредот би работел и би давал огромни грешки.
Да резимирам, Вашиот уред сепак е успешно изграден и добро програмиран, а неговата неправилна работа, се должи на неточните вредности на вградените компоненти: калибрацискиот кондензатор, кондензаторот C4 и индуктивитетот L1. Која е вредноста на кондензаторот за калибрација кај Вас, имате ли еден со точна вредност и толеранција од 0,5% (таков тешко се наоѓа) или тоа е некој блок-кондензатор со толеранција од 5 -10%? Не залудно, овој кондезатор јас го формирав со три паралелно поврзани кондензатори. Направете го и Вие истото ако не можете да најдете кондензатор од 1000pF со точност од 1% или 0,5% !
Петар Аврамовски
Здраво Емитер,
Имам две прашања за проектот "Телефонски повикувач за активиран аларм" од бројот 6/11 (ППК1120):
1. Дали е можно, кога ќе се активира алармот, уредот да бира број од мобилен кон друг телефон?
2. Каде, освен кај ГАЦ електроник, можам да го најдам reed релејот RS32000b?
Благодарам,
Лони Крстев – Струмица
Телефонскиот повикувач за активиран аларм е наменет исклучиво за дојава од мрежата на жичаната телефонија, и тоа само ако таа сè уште поддржува импулсен начин на бирање на телефонските претплатници. Активираниот аларм преку PIC микроконтролерот и релејот кој е поврзан со телефонската линија, со брзи краткотрајни прекинувања генерира импулси кои се препознаваат во телефонската централа како избирани броеви.
Бирањето на телефонски претплатник од мобилен телефон со помош на овој проект за телефонско повикување, не е возможно од едноставна причина што не постои начин повикувачот да се поврзе со мобилниот телефонски апарат. А и да најдете начин за поврзување сепак, бирањето не би успеало затоа што мобилните телефонски апарати бираат со тон-фреквентен начин на бирање, а не со импулсен (декаден), каков што поддржува опишаниот повикувач од Емитер 6/2011.
Постојат специјализирани уреди за дојавување на активиран аларм кои можат да бираат некој претплатнички број, било да е тоа од мрежата на "земската" или "воздушната" телефонија. Ваквите уреди се препорачуваат и се користат во оддалечени и непристапни места за обезбедување. Мобилен телефон со SIM картичка и непрекинато напојување преку полначот за телефон, поврзан е со системот за дојава, се активира и бира еден или повеќе меморирани телефонски броеви на местата каде што треба да биде извршена дојавата. Системот за дојава најчесто користи микроконтролер, а комуницира со мобилниот телефон преку надворешен конектор. Проекти за самоградба на уреди со ваква намена (јавување на мобилен телефон при активирање на аларм) имаме објавено во броевите 6/2002 (https://emiter.com.mk/napis/15285) и 10/2003 (https://emiter.com.mk/napis/9139).
На крај, би резимирал: ако внимателно се прочита и се проучи текстот и објаснувањето во него за начинот и работата на уредот, многу работи, па и оваа, ќе станат појасни.
Околу прашањето за рид-релејот: присуство на ППК на токму тој модел не е императив, освен во однос на неговите мали димензии и нечујноста при работата. Кој било релеј, со соодветен напон на возбуда и струја на привлекување на контактите до 100 mA, може во целост да го замени.
Петар Аврамовски
Како можат да им веруваат на You tube лаги и смешни видеа? Кој ќе заштеди со HHO генератор, јас лично ќе му го платам рестото бензин, или дизел, или плин. Водената пареа или HHO, како што ја нарекувате, не прави ништо друго туку само намалување на компресискиот простор во зима, а во лето го згуснува малку воздухот, а притоа ако се дозира неконтролирано (а како поинаку), само може да ја скрши радилицата. Драги мои, за да произведеш водород во количина од 100 денари, треба да потрошиш најмалку 500 денари. Ако сакате да заштедите со вода, мој предлог е да возите велосипед – водата ќе ви биде неопходна за HHO погон на колената :-)
Марјан Николовски преку
е-пошта
Читателите што мислат дека HHO работи, ако не му веруваат на ЕМИТЕР, нека прочитаат на: http://wiki.answers.com/Q/How_does_a_HHO_generator_work_on_vehicles.
Јасно е објаснето дека HHO генераторот не работи, а во последната реченица од текстот се кажува дека има награда од 1 милион долари за оној што ќе докаже дека работи.
Владица Сарк преку е-пошта
Го прочитав писмото од Тото во последниот број во врска со HHO генераторот и ви порачувам да не се вознемирувате од такви кои абер немаат од техника. За жал, сè додека има такви, некои шарлатански фирми ќе се богатат. Но и тоа е бизнис. Како и да е, продолжете понатаму, одлични сте засега.
Поздрав
Горан – Бубу преку е-пошта
Ви благодариме што ги споделивте Вашите размислувања за HHO генераторот со останатите читатели на ЕМИТЕР и што ни дадовте поддршка. Инаку, читателот со псевдоним Тото ни испрати уште 3 писма во кои не понуди никакви аргументи во полза на HHO генераторот, но затоа ги повтори навредите за сорабтниците на Емитер и за самото списание. Затоа нема никаква смисла да ги објавиме неговите писанија.
Слободан Таневски
Здраво Емитер,
Го имам изработено автомобилскиот аудиозасилувач од 70W (од Емитер 9/04) во стереоверзија. Решив да го поврзам во Застава 128 и го приклучив на CD плеер Pioneer. Сè додека колата е изгасната засилувачот работи супер но кога ќе се запали колата, се појавуваат шумови кои се зголемуваат со зголемување на вртежите. Се обидов, го исклучив CD плеерот од влезот и засилувачот го приклучив на мобилниот, и шумовите се изгубија, што значи дека не е до напонот, туку до аудиосигналот. Сакам да го искористам интегралецот LM1894 за овој проблем, па мала помош од Вас ако може.
Благодарам однапред.
Никола Танов
Нормално е дека од мобилниот телефон нема да има зуење бидејќи не се напојува од исто напојување со аудиозасилувачот. Во вашиот случај ЦД плеерот и аудиозасилувачот имаат исто напојување, односно иста маса. Но поради должината на жиците и, претпоставувам, употреба на обични жици за аудиосигналот, наместо коаксијален аудиокабел, меѓу масата на аудиозасилувачот и ЦД плеерот постои потенцијана разлика. Проблемот можете да го решите на 2 начина:
1. Употреба на филтер во напојувањето на аудиозасилувачот и ЦД плеерот.
2. Директно поврзување на напојувањето и масата од аудиозасилувачот и ЦД плеерот, а дури потоа поврзување со напојувањето и масата со остатокот од автомобилот (ЦД плеерот треба да биде изолиран од масата (металните делови на автомобилот) и со што пократка дебела жица да биде поврзан со масата на аудиозасилувачот – истото важи и за напојувањето).
Во секој случај, за поврзување на двата уреда треба да се употреби аудиосигнален кабел со добар квалитет.
Денис Галовски
Кај Вас проблемот не е во засилувачот, ни во ЦД плеерот. Проблемот Ви е во автомобилот!
Имено, сите понови типови автомобили имаат вградено како стандардна опрема соодветна "блокажа" која во голема мера ги елиминира електромагнетните пречки создадени од системот за палење и регулацијата на напонот на алтернаторот. Во Застава 128 таква блокажа не е вградена, па затоа имате проблеми! На пазарот (сè уште) постојат комплети за "блокажа" со помош на кои можете, зависно од моделот, помалку или повеќе ефикасно да ги елиминирате овие пречки. Тие вообичаено се состојат од филтер на 12-волтното напојување, сочинет од пар кондензатори и индуктивности, специјално дизајнирани и оклопени приклучни кабли и капи за свеќиците и додатен кондензатор на платините.
Покрај овие системи за "блокажа", препорачливо е исто така со засебни кабли од акумулаторот да се донесат и (+) плусот и (-) минусот до аудиоуредите! Тоа се прави со соодветни прописно монтирани "силиконски" кабли со попречен пресек од најмалку 2,5mm2! Притоа, особено внимавајте на квалитетната и прописна монтажа на "блокажата" и/или на засебните кабли за напојување – со тоа ќе ја намалите веројатноста од пожар во Вашиот автомобил.
Емилијан Иљоски
Pages
Пишувајте ни, прашувајте, коментирајте, предлагајте...
Ако имате некоја критика, пофалба или предлог за списанието, ако имате прашање или коментар во врска со некој напис објавен во ЕМИТЕР, ако имате прашање од која било област од науката и техниката или, ако имате проблеми со изработка и поправката на вашите уреди и системи – слободно обратете ни се.
Потрудете се вашите писма да бидат кратки и прецизни, но внимавајте да ги содржат сите неопходни информации во врска со темата. Ќе се потрудиме нашиот одговор да го добиете што побрзо (преку e-mail), а најинтересните писма, заедно со нашиот одговор ќе бидат објавени во списанието и на нашиот Веб портал (https://emiter.com.mk/pisma). Во секој број едно писмо ќе биде прогласено за “Писмо на бројот“ и неговиот автор ќе биде награден со полугодишна претплата на ЕМИТЕР.
Напоменуваме дека сите писма што ќе пристигнат на адреса на редакцијата сметаме дека се испратени со цел да бидат објавени. Редакцијата го задржува правото да ги обработи писмата што ќе бидат објавени, во насока на лектура, појаснување и кратење. На крајот, мора да напоменеме дека, и покрај нашата желба, сепак, не сме во можност да одговориме на сите писма и прашања.