За регулирање на брзината на еднонасочните мотори со четкички постојат повеќе методи. За да се одржи брзината на моторот на претходно нагодената вредност, потребни се две основни компоненти: систем за управување на брзината на моторот и систем за мерење на моменталната брзина на моторот. Доколку оската на моторот не е оптоварена, по доведувањето напон на моторот неговата оска ќе се придвижи, и по кратко време ќе постигне одредена брзина. Во таа состојба доколку напонот на напојувањето опадне или се зголеми товарот којшто се наоѓа на оската, ќе се намали брзината на вртење. За брзината на вртење да се одржи константна, потребно е да се доведе поголема електрична енергија. Кај еднонасочните мотори, управувањето наједноставно може да се изведе со доведување променлив напон или со импулсно-ширински модулиран напон (во понатамошниот текст ИШМ-напон).
Информацијата за моменталната брзина со која се врти оската на моторот може да се добие преку повеќе методи кај кои најчесто се користи дополнителен сензор што е во механичка спрега со оската. Во уредот за контрола на брзината опишан во овој труд употребена е т.н. Back EMF метода, со која брзината се одредува според напонот кој го генерира моторот кога на неговите доводни клеми ќе се отстрани влезното напојување додека оската сè уште се врти под инерција.
За да се добие поголема стабилност на бројот на вртежи, регулирањето на брзината се изведува со добропознатиот PID-метод, со кој се постигнува голема стабилност и прецизност брзината да биде што поблиску до нагодената, без разлика на влезниот напон кон системот или товарот на моторот.