Најголемиот дел од постоечките сис­теми наменети за мешање ајвар во себе содржат едноставен систем на контрола на моторот што се заснова на вклучу­вање/исклучување на системот од на­појување со прекинувач или директно од приклучницата, како и користење потен­циометар за контрола на неговата бр­зина на вртење. Ваквиот начин на работа на системите бара постојано присуство на човек што ќе го врши управувањето, а воедно не даваат никаква инфор­ма­ција за состојбите во коишто се наоѓа системот.

За разлика од нив, АППА-системот нуди автоматска кон­трола на брзината на моторот, како и негово самостојно вклучување/исклучување во согласност со потребите при дадената темпе­ратура. Во себе има интегрирано SCADA-систем што врши континуирано мерење на те­ков­ните состојби и има можност за авто­матско контролирање на брзината и вклученоста на моторот. Исто така вклу­чува опција за рачна контрола на моторот преку физичките копчиња на кутијата или преку виртуелните на кон­тролната табла.

Иако системот целосно не ја исклу­чува потребата од човечки надзор, зна­чително ја намалува неговата инвол­вираност.

Вака изработениот SCADA-систем заедно со развојната плочка Arduino UNO нудат стабилна основа за лесна над­градба на системот со други опции, како воведување потсистем за контрола на горивото и сл., но и лесна пренамена на системот за други функции.

Во првиот дел од овој напис беа пре­зентирани повеќе хардверски елементи од проектот, заедно со начинот на пре­сметка на елементите. Следува описот на останатите електронски кола, реше­нието на плочката со печатено коло и, секако, изработениот софтвер за работа и контрола на системот.