Здраво ЕМИТЕР !
Сакам да ве прашам дали знаете каде можам да купам магнети за сам да си направам генератор за струја. Исто сакам да ве прашам дали роторот од мотор од перална можам да го магнетизирам и да го направам постојан магнет и ако може како да го направам тоа? И последно. Кој метал се магнетизира и како и што треба да направам за да го магнетизирам?
Однапред ви благодарам.
Поздрав!!!

Перманентен или постојан магнет може да се направи од таканаречените тврди магнетни материјали. Тоа се матаријали кои откако ќе се постават во магнетно поле, на пример во некоја навивка низ која тече еднонасочна струја, по престанување на течење на струјата "остануваат" да бидат магнети. Не толку "јаки" како кога низ навивката течеше струја, но сепак, магнети. Меките магнетни материјали кога ќе се постават во навивка низ која тече струја и самите стануваат силни магнети, но по престанувањето на струјата низ навивката потполно се размагнетизираат. Од меки магнетни материјали се изработуваат магнетните кола на електричните машини и трансформаторите. Во таа смисла, од роторот на мотор за машина за перење не може да се изработи постојан магнет токму поради таа причина.
Постојани магнети се изработуваат од тврдите магнетни материјали. Челикот со големо количество на јаглерод во својата структура е тврд магнентен материјал. Од таа причина некои шрафцигери кои биле во допир со постојан магнет и самите се намагнетизирале. Од ваков челик биле изработувани магнетите кај постарите звучници. Овие постојани магнети се "слаби" во однос на постојаните магнети добиени од специјалните легури и смеси. Значи правењето на силен постојан магнет во домашни услови не доаѓа во предвид. Правењето силен постојан магнет е проблем дури и за фабриките кои произведуваат генератори. Тие наместо употреба на постојан магнет се решаваат за користење на електромагнет. Имено дел од енергијата што ја генерира самиот генератор се користи за самовозбудување на генераторот и создавање на силен електромагнет.
Што се однесува до правењето на генератор во домашни услови, најдобро е да искористите некој генератор од автомобил кој би бил поврзан на некој неелектричен двигател (на пример, мал бензински мотор). А може и електричен. Во тој случај би добиле квалитетен AC/DC претворувач 230V/12V насочувач со моќност од околу 500W.
Кирил Крстевски

Сакам само неколку зборови да кажам за вашето списание ЕМИТЕР! Го читам ЕМИТЕР од првиот број, т.е. од август 1995 година, но мислам дека како што поминуваа годините ова списание го загуби својот квалитет. На пример:
1. Во старите броеви или поточно во броевите до 2000-та година се даваа нацртите на водовите на плочките со печатено коло и тие можевме самите да ги направиме, но од броевите од 2001 па навака тие нацрти веќе не се даваат.
2. Имате еден натпис во кој пишува "Ние го објавуваме она што другите љубоморно го кријат", а половина од шемите што ги давате во списанието се КРАДЕНИ од англиското списание ELEKTOR!!!
Иван Тодоровски, преку е-маил

Навистина сме изненадени од Вашите критики, кои ги сметаме за потполно неосновани! Исто така, изненадени сме што Вие, како наш читател од првиот број, во претходните броеви не сте ги прочитале нашите одговори на сличните критики од (вкупно само) два-тројца незадоволни читатели. Но еве, ќе го повториме нашите одговори:
1. Нацртите на плочките за печатено коло (ППК) веќе не ги објавуваме, од проста причина што ние продаваме професионално изработени ППК и тоа по цена приближно еднаква на празна плочка!!! Сигурно дека ќе се сложите дека нема никаква логика некој да се мачи да изработува плочка, кога таа ППК може веднаш да ја добие веќе изработена, речиси за истата цена како и празна, ненагризена плочка! Понатаму, со необјавувањето на нацртите на ППК се заштедува простор во списанието за нови проекти, што за една година се акумулира во толкав простор, доволен за уште два или три нови проекти! Сигурни сме дека ќе се сложите дека тоа е во интерес на повеќето читатели.
2. Ние сме претплатени на ELEKTOR и на уште десетина други научно-технички списанија, па затоа сме апсолутно сигурни дека половина од шемите (т.е. проектите) кои се објавени во ЕМИТЕР не се исти со оние во ELEKTOR! Можете ли да ги наброите тие електронски конструкции за кои мислите дека се украдени од ELEKTOR? Дали тој број навистина излегува дека е една половина од бројот на електронските конструкции објавени во ЕМИТЕР во текот на една година? Ние сме сигурни дека не е така! Тука морам да објаснам неколку работи кои Вие очигледно не ги земате предвид:
Во светот постојат многу списанија за наука и техника, чија задача е на своите читатели да им ги претстават новите достигнувања во науката и техниката кои други ги направиле! Никој од читателите на тие списанија не очекува и не бара во тие списанија да бидат објавувани само оригинални откритија и конструкции од членовите на редакцијата и соработниците на тоа списание! Бидејки и ЕМИТЕР исто така е популарно списание за наука и техника, нормално е во него да се објавуваат, пред сè, познати работи (претходно објавени на некое друго место), но преработени и прилагодени на приликите во Македонија.
Како што повеќе пати досега сме нагласиле, нашата политика е во ЕМИТЕР да се објавуваат само авторски написи, а не целосни копии и преписи од странски списанија (како што, на пример, прават српските списанија "Инфо електроника" и "Аудио проекти"!). И покрај тоа што не сме во можност постојано да правиме "истрага" дали случајно некој од нашите соработници не ја почитувал оваа наша политика, сепак сме сигурни дека бројот на ваквите злоупотреби е минимален, ако воопшто постојат.
Од друга страна, ако сте забележале дека некој проект од ЕМИТЕР личи на некој објавен во ELEKTOR, тоа воопшто не значи дека тој е целосен препис, т.е. плагијат! Понекогаш некој од нашите соработници навистина ќе ја земе идејата (но само идејата!) од некој проект од некое странско списание (па и од ELEKTOR), но ќе ја преработи на свој начин и во согласност со условите што владеат во Македонија – некаде има промени во шемата, а речиси секогаш има промени во текстот и во дизајнот на ППК, а тоа воошто не е едноставна работа и токму заради тоа претставува оригинално дело, а не кражба. Тие проекти во ELEKTOR често пати се изработени на двослојни ППК и со surface mount компоненти, додека преработените проекти во ЕМИТЕР се направени за стандардни компоненти и еднослојна ППК! Иако нацртот за тие двослојни плочки е даден во ELEKTOR, ниту еден електроничар-аматер не може самостојно да ги изработи (дали Вие можете да изработите двослојна ППК со plate-through дупчиња?). Така, оние читатели на ELEKTOR кои сакаат да го изработат тој проект, принудени се да ги купат тие изработени двослојни ППК од ELEKTOR по отровно висока цена од 3 до 20 фунти, т.е. од 4,5 до 30 евра! Погледнете го ценовникот за ППК во ELEKTOR и уверете се!
Да напоменеме и тоа дека дури и ELEKTOR објавува проекти кои се многу слични на некои проекти претходно објавени во други списанија. Поентата е во тоа што постои само конечен број на варијанти на шеми на, да кажеме, аларм за светло во кола, или за осцилатор. Нормално дека таквите шеми од различни списанија ќе личат едни на други, иако најверојатно никој од никого не копирал.
Најпосле, не е фер да правите споредба на ЕМИТЕР со ELEKTOR, кога се знае дека во ELEKTOR покрај раководството и помошниот персонал, постојано се вработени уште десетина електроинженери, чија единствена задача е да смислуваат нови проекти и за тоа земаат соодветна плата (од неколку илјади евра), а згора на тоа имаат и голем број на повремени соработници од целиот свет! Од друга страна, во ЕМИТЕР единствено вработени се главниот уредник и техничко-административниот персонал, а сите други (авторите!) се само хонорарни соработници кои со голема љубов изработуваат проекти и подготвуваат написи, жртвувајќи значаен дел од своето слободно време за популаризација на електрониката и другите научни дисциплини.
Мислам дека цената од 130 денари, колку што плаќате за ЕМИТЕР, е повеќе од оправдана за она што го добивате - проекти и ППК преработени и прилагодени за овдешните прилики, заедно со други интересни текстови од многу други научни и технички области. Кога ќе го сфатите ова, сигурен сум дека ќе исчезнат Вашите критики за ЕМИТЕР и дека ќе продолжите да го читате со поголемо задоволство. Ако, сепак, сметате дека ЕМИТЕР не ја оправдува својата цена, тогаш ни преостанува само да Ви препорачаме редовно да го купувате ELEKTOR по цена од 630 денари (за колку се продава во Македонија).
Владимир Филевски
П.С.
Максимата "ЕМИТЕР ви го дава она што другите љубоморно го кријат" се однесува на широко распространетата појава одредени "стручњаци за електроника" во Македонија да не сакаат да го споделат своето (ограничено) знаење на останатите. Ние во ЕМИТЕР сметаме дека само оној кој има ограничени знаења, се плаши да го предаде тоа свое знаење на останатите, бидејќи тогаш и останатите ќе го имаат истото знаење како него (па тогаш тој по ништо не би отскокнувал од останатите). Од друга страна, оној кој многу знае, не се плаши да го предава своето знаење на останатите, бидејќи колку и многу да кажува од своите "тајни" тоа знаење никогаш нема да "пресуши". Како што можевте да забележите досега, токму во ЕМИТЕР ги дознавте оние "тајни" кои некои "стручњаци за електроника" во Македонија љубоморно ги чуваа само за себе.
Значи, максимата "Ние го објавуваме она што другите љубоморно го кријат" се однесува на сосема друго, а не на "уникатноста" на нашите проекти, иако некои од нашите проекти се навистина уникатни!.

Здраво ЕМИТЕР.
Со помош на списокот на содржини кој ми го испративте, избрав да купам околу 100 броеви, па сакам да ми кажете вкупна цена за нив. Исто така, ме интересира дали може да ми пратите само одредени содржини од списанијата (не целосен примерок) и ако може тогаш пишете ми за да ви набројам кои содржини од кој број.
Инаку, јас сум електричар и 3 години работам како монтер и сервисер за алармни уреди од "DSC", уреди за надзор и уреди за безжична комуникација од CISKO SYSTEMS, како и монтер на електрика во станбени згради во Струмица. Покрај ова, навистина сум заинтересиран и за електронски уреди, па може да се каже дека сум ваш колега :)
Токму затоа сакам да знам дали имате микробушилки за електронски бакарни плочки и да ми кажете со што е најубаво да се цртаат истите и со кои хемиски течности се нагризуваат и за колку време. Јас ги цртам со алкохолен маркер, а за нагризување купувам готова хемикалија, но не сум задоволен многу како излегуваат моите плочки.
Голем поздрав до вас и благодарам на соработката и вниманието.
Ѓорѓи Емљаков од Струмица

За пофалба е вашиот голем интерес за ЕМИТЕР, па затоа за толкава количина на стари броеви ќе ви одобриме попуст од 30%. Точната вкупна сума зависи од тоа кои броеви ги имате избрано.
Поединечни написи не испраќаме поради неколку причини:
- за да испратиме само еден напис треба да го искинеме примерокот и така да го уништиме;
- продавањето на поединечни написи е во спротивност со издавањето на списанието: ако дозволиме секој читател да си нарачува само одделни написи, тогаш ќе треба да престанеме со издавање на ЕМИТЕР, бидејќи тоа ќе стане неисплатливо;
- продавањето на одделни написи, иако навидум е во полза на читателите, тоа сепак не е така: често ќе се случува некој отпосле да има потреба и за друг напис од истиот број, па во таков случај ќе излезе за два написа да плати колку за цел број.
Иако во овој момент можеби ве интересираат само одделни написи од секој број, земете ги целите броеви, бидејќи сум убеден дека во нив ќе најдете барем уште неколку написи кои ќе ви бидат интересни и потреби, ако не во овој момент тогаш во некоја блиска иднина.
Цртањето и изработката на плочките со печатени кола (ППК) во аматерски услови може да се направи на различни начини: со алкохолен фломастер (опишано во ЕМИТЕР 7-8/97 и 4/06), со самолепливи ленти (Е 12/99), со фотопостапка (Е 4/98) и со пренос на тонер од ласерски печатач (Е 4/06). При тоа може да се користат различни киселини за нагризување, што исто така било објаснето во спомнатите написи. Дизајнот на шемата и ППК може да се направи рачно или со соодветна компјутерска програма: со Corel DRAW (види во Е 4/99 и 11/03), со Protel (ЕМИТЕР 1, 2 и 3/98), со Eagle (ЕМИТЕР 2, 3 , 4 и 5/06) или со некоја друга.
Плочките најдобро е да се дупчат со моделарски дупчалки кои имаат голем број на вртежи и се со моќност од 20 до 100 W. Такви дупчалки можете да набавите во продавниците за електронски материјали или во продавниците за електрични алати.
Со надеж дека ви помогнав, срдечно ве поздравувам.
Слободан Таневски

Здраво ЕМИТЕР!!!
Имам еден проблем со програмата што ја презентиравте во вашето списание, па се надевам на ваша помош.
Станува збор за EAGLE 4.1. Оваа програма ја "симнав" од линковите што ги посочивте, но никако не можам да ги направам потребните нагодувања за добиената ППК да биде еднослојна. Откако ќе ја нацртам електричната шема, се префрлам во цртање на монтажната шема во: board, ќе ги преместам елементите во местото предвидено за ППК и одбирам tools - auto... - ok. Добиената ППК е двослојна! Пробав нешто да променам во: tools - Drc.. - во картичката Layer, но без успех. Ако може да се промени нешто за добиената монтажна шема да биде за еднослојна ППК, ве молам објаснете како.
Однапред ви благодарам
Александар.

За да можете да дизајнирате еднослослојна ППК треба преку прозорецот Tools->DRC да се нагоди употреба на два слоја: Top – кој ќе го користите за куси врски и Bottom – кој ќе го користите за водовите кои ќе ги поврзуваат изводите на компонентите.
За да се дизајнира еднослојна ППК воопшто не е препорачливо да се користи AutoRoute опцијата речиси за ниту еден програм за дизајн на ППК. Моето искуство "вели" дека секогаш ние самите ќе дизајнираме далеку подобра ППК од кој било програм кога станува збор за еднослојна ППК. Но, сепак, за проба, по претходното нагодување треба да се одбере конфигурацијата прикажана на сликата, по активирање на опцијата: Tools->Auto.
Благој Ќупев