Кога некој уред не работи, иако содржи квалитетни компоненти, најмногу се сомневаме во неисправноста на активните компоненти. Електронскиот склоп прикажан на слика 1, овозможува многу брзо и едноставно испитување на најчесто користените интегрирани електронски кола, како што се, на пр.: 555, 741, 3130, TL071, TL081, LM324, 4001, 4011, 4017, 4027, 7400, 7403, 7490, и 15mm-ски седумсегментни дисплеи со заедничка катода (CC – Common Cathode).

При дизајнирањето на плочката со печатеното коло (ППК) направив компромис да не е многу голема за да ја намалиме цената за нејзина изработка, а од друга страна, димензиите се така избрани, за со распоредот на компонентите да ви овозможиме лесен пристап на одделните подножја. Со тоа, на најмала можна мерка ги смалив проблемите при ставањето, односно вадењето на интегрираните кола.

За секое интегрирано коло (IC) е предвидено посебно испитувачко коло. Во пракса главно се испитуваат едно по едно IC, но нема да има никаква опасност истовремено да се искористат сите расположиви места (DIL подножја) за испитување. При испитувањето, на секое интегрирано коло му припаѓа одреден и нагоден влезен сигнал, а излезниот сигнал е видлив на соодветните LED диоди. Трепкањето на лед диодите е со фреквенција од 2Hz, лесно е уочливо, а тоа кажува дека испитуваното интегрирано коло е исправно. Ако соодветната лед диода свети без прекин или не свети, тогаш IC-колото кое се испитува е неисправно, т.е. оштетено.