Долго време, гледајќи го аналогниот LC-метар пред себе на работната маса, изграден во далечните деведесетти а објавен како проект во ЕМИТЕР бр.7-8/96 г., ми се роди желба за изградба на нов, “помлад брат”, дигитален LC-метар. Во расчекор помеѓу желбите и можностите, многупати се откажував поради пресложеноста или економската неисплатливост на уредот. Со појавата на микроконтролерите, а особено откако го изградив својот прв програматор според проектот во ЕМИТЕР бр.4/03г, размислувањата ги насочив во тој правец.

Први чекори

Добро е кога човек знае што сака, што бара и како да го најде. Интернет, а каде на друго место...? По долгочасовно “сурфање”, со каква не комбинација на клучни зборови, го пронајдов вистинското решение. Мала конфузија настана кога за истиот уред најдов неколку шеми кои се разликуваа во некои варијанти на реализацијата, а за маката да биде уште поголема најдов и неколку различни програмски кодови, “hex" фајлови за програмирање на микроконтролерот. Секако дека во ниеден момент не помислив да се откажам. Повеќепати ги препрочитував искуствата на електроничарите кои го изградиле уредот, на форумите кои ги најдов, поврзани со WEB страниците на LC-метарот. Вредеше да се проба, иако постоеше доза на неизвесност и несигурност. Ги пробав сите можни варијанти, повеќе пати програмирајќи го микроконтролерот со различни “hex" фајлови.

ОПИС НА LC-МЕТАРОТ

Работата на уредот во целост ја сфатив откако го изградив уредот и неколку пати ја преправав основната шема, која сега ќе ја претставам во крајната форма. Најнапред ќе ја прикажам суштината на неговата работа и мерењето преку поедноставена блок-шема, а потоа ќе се навратам на анализа и објаснување на електричната шема.