Пред да се доведе аудиосигналот на влезот од аудиозасилувачот на моќност, тој треба да се засили на одредено ниво (ако е потребно), откако ќе се засили треба да се обработи, односно на него треба да направиме тон-корекција, а сето тоа се прави (како што имаме пишувано во повеќе проекти од оваа област во претходните броеви на ЕМИТЕР) заради приспособување на звукот според нашиот слух и вкус. Тоа сето е потребно поради нелинеарната чувствителност на нашите сетила за слух (ушите) во целото чујно аудиофреквенциско подрачје.

Со повеќегодишно искуство во оваа област дојдов до ова соодветно квалитетно решение на оваа тон-контрола, која ја нареков универзална од следните причини: - на нејзините влезови можете да приклучите кој било извор на аудиосигнал кој на својот излез испорачува аудиосигнал со вредност од 2mV па сè до 2,5V; - со помош на преклопникот S1 кој е поставен на влезот на оваа универзална тон-контрола (на влезот на предзасилувачот) се прави селекција на влезниот сигнал, односно правиме селекција кој извор на аудиосигнал сакаме да го слушаме (ЦД-плеер, тјунер, микрофон итн.); - за подобрување на стереосликата (за добивање на просторниот звук), оваа тон-контрола располага со посебно електронско коло за 3Д стерео, кое по потреба со помош на прекинувачот S2 може да се активира; - за корекција (издигнување или придушување) на ниските и високите фреквенции, ова коло располага со активна тон-контрола која користи негативна повратна врска, односно Баксандалово коло; - на излезот на оваа тон-контрола е поставен филтер кој ја намалува (спречува) можноста од преоптоварување на влезот од аудиозасилувачот на моќност од несакани индуцирани осцилации во каблите; - во градбата на тон-контролата се употребени квалитетни малошумни операциски засилувачи, кои лесно можете да ги најдете на нашиот пазар.