Електронските кодирани брави може да се изработат на повеќе начини. Мислам дека наједноставен начин е реализација со тастатура и соодветна логика која овозможува хардверски избор на пристапниот код. Токму таква е електронската брава прикажана во оваа апликација. Таа може да се поврзе со која било тастатура, а за нејзина изработка доволни се само две широко распространети CMOS интегрирани кола и десетина дискретни компоненти. Пристапниот код со кој се активира бравата се состои од четири цифри (тастери), а ако тоа е тешко за помнење бројот на цифри во пристапниот код може де се намали. Пристапниот код се внесува со притискање на тастерите по даден редослед. Нередоследното притискање на тастерите едноставно се игнорира. Сите цифри, односно тастери кои не се дел од пристапниот код даваат дополнителна заштита од несакано отворање. Со притискање на кој било од овие "лажни" тастери логиката за прифаќање на пристапниот код се поставува во појдовна положба.