Во сè она што го слушаме заедно со основниот звук емитуван директно од звучниот извор вклучен е и рефлектираниот звук. Во процесот на еволуција сме станале способни да го перципираме овој рефлектиран звук така што тој ни говори нешто за нашата непосредна околина, дури и во потполна темница. Ако ги елиминираме овие рефлексии тогаш звукот којшто го примаме би ни се чинел "мртов", како што може да ни потврди секој што во некоја пригода се нашол во т.н. глува (анехоична) соба. За звукот да предизвика кај нас чувство на простор и реалност, потребни ни се звучните рефлексии, но кога инструментот е озвучен со микрофон одблиску (или звукот е синтетизиран), присуството на овие природни рефлексии е намалено до таа мера што мораме да вметнеме вештачка реверберација за да го повратиме чувството за реалност. Постојат повеќе начини за додавање вештачка реверберација и ехо, но денес (поточно последниве 30-ина години) на ова поле доминираат дигиталните уреди. Интензивниот развој овозможи појава на специјализирани интегрирани кола за таа намена, така што нивната градба стануваше сè поедноставна и покомпактна, можностите поголеми, а цените пониски. Денес постои широк спектар специјализирани ИК со кои може да се реализираат различни категории на дигитални ревербератори – од наједноставни уреди какви што се користат во гитарските ефекти и караоке-засилувачите, до најсложените кои се користат во тонските студија и во професионалните системи за озвучување. Ќе наведам само неколку: HT8955A, M65831P, PT2396, PT2399, AL3201, FV-1... Нашиот дигитален ехо-реверб процесор EERev-4 е дизајниран со цел да се добие релативно едноставен и евтин уред, но кој сепак ќе дава прилично реалистична симулација на природната реверберација и ехо. Заради најповолниот однос цена/квалитет, одлучив проектот да се базира на интегрираното коло PT2399, широко употребувано во гитарски ефекти, караоке-засилувачи, мултимедијални системи и во автомобилското аудио. Меѓутоа, за разлика од неговата вообичаена примена како single-chip ехо/ревербератор, јас во мојот проект одлучив да вклучам четири вакви кола во конфигурација која е карактеристична за посложените и поквалитетните ревербератори. Така добив уред со многу богата структура на задоцнети сигнали со кои се добива прилично реалистична симулација на природната реверберација, а во исто време уредот е релативно едноставен и евтин. Заради обемот проектот ќе биде изложен во три продолженија, а ќе содржи кратка теорија за звучните појави реверберација и ехо, потребата за нивна вештачка симулација, краток приказ на постоечките решенија на едноставни ехо-реверб уреди, презентација на проектот од идеја до практична реализација, резултати од извршените мерења и слушни тестови, а на крај ќе заврши со кратка анализа на можностите за комерцијално производство, унапредување и поедноставување на овој ехо-реверб процесор.