Дел од читателите сигурно веднаш се прашуваат зошто презентитаме едноставен аудио миксер и зарем не е подобро да прикажеме миксер со повеќе канали и повеќе можности. Еве неколку причини зошто се одлучивме за овој проект:
1. Бидејќи дел од читателите ги немаат ни основните теоретски и практични знаења од областа аудио миксери и бидејќи во списанието ова е прв проект од оваа област, тој мора меѓу другото да има и едукативна функција. Таа функција полесно се остварува доколку проектот е едноставен и ги содржи само основните функции.

2. Со својата едноставност и широка употреба (на пример за озвучување на домашни забави и слично) миксерот ќе биде интересен и лесен за изработка за голем број читатели, дури и за оние што имаат многу мало или никакво искуство во електрониката. Изработувајќи го овој миксер читателите ќе стекнат знаење и искуство кое ќе им помогне во иднина при изработка на некој посложен миксер.
3. Овој едноставен миксер може да биде корисен и за поискусните конструктори – доколку се најдат во ситуација да им е потребен миксер, а немаат време за изработка на некој посложен модел. EM 3S можат да го изработат со материјалот од домашната работилница за само 2 до 3 часа.
Доколку по овој опширен увод сте заинтересирани за изработка на овој едноставен миксер тогаш да преминеме на неговиот опис.