Ги порачав деловите и плочката за "Автоаларм" од ЕМИТЕР 5/98. Но, сакам да направам мала модификација на алармот, за која верувам дека ќе ми помогнете. Сакам моментот на влегување и на излегување да го нема, а со тоа не би ми требало ни ожичување до контакт-бравата. Ја имам изработено телекомандата за дворна или гаражна врата од ЕМИТЕР 2/03, па така би сакал алармот да го вклучувам и исклучувам со телекомандата, а контакт-бравата да нема никаква улога. Ве молам пишете ми кои делови да ги променам и како да го изведам тоа.
Однапред благодарам.
Иван, преку e-mail
Веќе подолго време се обидувам да откријам која Ви е целта, но никако не ми поаѓа од рака. Временската задршка „време (момент) на излегување" може да се елиминира со отстранување на кондензаторот C2. Бидејќи ја губат својата функција, истовремено треба да се отстранат и отпорникот R15, транзисторот T1 и диодата D8. За елиминирање на временската задршка „време (момент) на влегување", кондензаторот C3 треба да се отстрани (отстранувањето сметајте го како замена со отворена гранка) или замени со отпорник. Ако отпорноста на тој отпорник е мала, алармот воопшто нема да функционира. Ако отпорноста на тој отпорник е под некоја гранична вредност (мојата пресметка вели дака таа гранична вредност е нешто над 2 M оми), при активирање, односно деактивирање на некој од изводите 3, 4 или 5 само компараторот A2 ќе ја менува состојбата на својот излез. Просто речено, непотребна силна електроника за вклучување и исклучување на релеј. Ако, пак, отпорноста на тој отпорник е над граничната вредност, претпоставувам ќе се добие осцилатор со фреквенција зависна од капацитивноста на кондензаторот C5.
Георги Ефтимов
Здраво!
Најнапред голем поздрав до Редакцијата на Емитер, која се грижи сè уште да опстојува едно вакво списание, кое во секој нареден број ни сервира квалитетни и свежи информации, што значи да се биде нонстоп "up-to-date" во поглед на примена на науката и техниката, и списание од коешто не само што се чита, туку и се учи. Опфатени се голем број области од науката и техниката - што значи информации за секого и тоа "од прва рака". За цената кратко ќе кажам дека е единствената работа во Македонија за која плаќаш малку, а добиваш многу! Емитер го читам веќе неколку години при што (покрај другото) обрнувам внимание и на писмата упатени од читателите за одредени проекти или за посебна стручна помош. Затоа и се одлучив и јас да побарам помош од вас на овој начин.
Се работи за "правилен" начин на поставување на сараунд звучници. Сакам да составам еден квалитетен сараунд систем, при што досега се служев со литература од Dolby и една многу добра "брошура" од веб-страницата на Polk audio. Проблемот се состои во поставувањето на задните звучници, за кои најчеста положба (според брошурите) е на висина од околу 2 метри од земја, свртени еден кон друг, поставени на страничните ѕидови. Кога бев во потрага по соодветни звучници за таа намена, често пати продавачите ме убедуваа дека тоа не е така и дека тие треба да бидат поставени во висина на уво (во седечка положба) и свртени спрема напред, а не еден кон друг, па за таа намена ги нудат своите сталаци за звучници на таа висина (за кои мислам дека се наменети за помали предни звучници). Сега навистина не знам што да правам. Не сакам да погрешам при изборот, бидејќи во секој случај 5 звучника + еден сабвуфер + еден А/В ресивер е еднакво на многу пари. Би сакал од вас да добијам некој совет за тоа како да ги поставам задните звучници, односно како тоа во пракса се прави најчесто за 5.1 и 7.1 системите!
Сè уште се двоумам за уште една работа: дали да ги почекам новите модели на Sony рисивери од ES серијата со S-master pro засилување или да одберам некој од веќе докажаните модели на Харман/Кардон или Денон. Дали имате некоја информација за овие модели на Sony, односно дали S-master pro технологијата е нешто "нај-нај" во моментов, или би било попаметно да се инвестира во Харман или Денон?
Многу поздрав од
Драган Димитриевски од Скопје
Ви благодариме на убавите зборови. Што се однесува до поставувањето на задните звучници, продавачите не се во право! Единствено правилно е поставувањето на височина од околу 2 метри. Меѓутоа, тука има една "финта" која ретко каде и ретко кога се кажува: задните (страничните) звучници треба да бидат од дипол тип! Понекогаш и понекаде, заради специфичностите на акустиката на просторијата, подобро решение е биполарен тип. Единствено со ваквите дипол (или биполарни) звучници ќе ги добиете звучните ефекти во вашиот дом точно онака како што ги замислил режисерот на филмот! Ваквите типови на звучници се поретки - веројатно поради повисоката цена.
Но, не очајувајте - и обичен (класичен) звучник многу добро ќе си ја заврши работата како "заден", ако го поставите на височина од околу 2 метри и ако НЕ го насочите накај местото за слушање. Во зависност од просторијата, постојат две решенија. Ако "задните" звучници можат да се постават бочно (или на страничните ѕидови), најдобро е да бидат поставени малку поназад од местото за слушање и задолжително треба да се насочат еден кон друг (не кон слушателот!). Второто решение е за оној случај кога задните звучници не можат да се постават бочно - тогаш треба да се монтираат позади (или на задниот ѕид), а да бидат насочени кон предниот дел од просторијата.
Претходново кажано важи за правилна репродукција на звучни ефекти во филмови, во форматот 5.1. Постојат концерти на DVD снимени во повеќеканална техника (значи, примарно е аудиото) и таму работите околу поставувањето на "задните" звучници веќе не се толку јасни. Стариот стандард е "задните" звучници да се постават во височина на увото (во седечка положба), насочени директно накај слушателот. Во овој случај, најдобра репродукција се постигнува ако "задните" звучници се идентични со предните (левиот и десниот).
Збунети сте? И јас исто така, па затоа се држам до старото, добро двоканално стерео. А и поевтино е.
Новата технологија S-master pro на Sony теоретски навистина има предност пред старите решенија, но тоа треба да се провери во праксата, бидејќи само со правилна и квалитетна имплементација ќе се осетат (чујат) предностите. Погледнете некој компаративен тест во странските списанија специјализирани за аудио/видео. Во некој од наредните бореви на ЕМИТЕР планираме да направиме ваков тест.
Владимир Филевски
Голем поздрав до сите во редакцијта на ЕМИТЕР. Ја подржувам вашата идеја за издавање на брошури во склоп на ЕМИТЕР, а предлагам исто така да издадете и ЦД во кое не мора да има текстови или колекција на електрични шеми или, пак, брошури во електронска форма, но може да има софтвери од типот на помошни програми како на пример за правење PCB или конструкција на звучни кутии, обележување на ел. елементи, програми за PIC флеширање или, пак, од типот на мастер конвертер. Исто така може да има и разни програми за астрономија од конвертирање на координати, па сè до прикажување на моментална положба на некој објект кој треба да се следи на небото, а да не спомнувам разни услужни програми за PC. Мислам дека има доволно со што да се пополни едно ЦД без разлика дали се тоа Freeware или shereware и др. типови, а би било корисно да се запознаат читателите дека постојат разни помошни програми коишто повеќе или помалку би им ја олесниле работата.
Сега да ве замолам – имам еден мал проблем што со ваша помош би сакал да го решам, а би било и корисно да излезе во вашето списание. Се занимавам со фотографија. Аматерски вршам фотографирање на спелеолошки објекти, при што фотографирам и големи пештерски сали кои можат да бидат со огромни димензии каде што треба да се слика со (B) положба на затворачот од фото апаратот со помош на дополнително осветлување. Проблемот е во тоа што сакам да искористам фотографирање со повеќе блицови наедаш. Тоа се постигнува со користење на такаречена Фото Буба која се поставува на секој блиц кој треба да окине, кога главниот блиц кој е на апаратот се активира. Со тоа многу би ми се олеснила работата. Овие Фото буби чинат од 20 евра па нагоре и кај нас не сум сретнал да се продаваат. Побарав преку Интернет некоја шема за самоградба на ваков уред, но тие што ги најдов се со користење на додатен извор од 9V до 2V, но мене ми е потебно да не се употребува воопшто батериско напојување, значи кога ќе се поврзе на блицот кај кабелот или конекторот за окинување да го окине, но без да употребувам + извор.
Ви брагодарам многу ако барем го прочитате писмово и ми пишете, а јас за возврат ќе ви подарам неколку слики направени со фото бубата во пештера.
Ваш редовен читател од Скопје
Христијан Гроздановски
Сето она што го предлагате за ЦД-то кое би одело како додаток на ЕМИТЕР одамна е и наш план и, ако не порано, сигурно ќе го реализираме догодина кога славиме 10 години ЕМИТЕР. Исто така планираме такво ЦД во иднина да издаваме барем 2-3 пати годишно.
Вашето прашање во врска со самоградба на "фото буба" го проследив до нашите соработници па ако имаме можности сигурно ќе биде реализирано.
Слободан Таневски
Почитувани,
Со внимание ја следев серијата написи за телескопите и многу сум задоволен од неа. Исто така, задоволен сум и од телескопот кој го изработив според вашиот нацрт од Емитер 12/03, но сега би сакал да купам некој помоќен телескоп, но не многу скап. Знам дека во летниот двоброј посочивте адреси во странство, но нарачувањето оттаму ми е комплицирано (немам никој во САД кој би можел да ми го донесе), а и повеќето модели се скапи за мене. Се разочарав од информацијата дека кај нас нема некоја понуда на телескопи. Сепак, деновиве во продавницата Ексима кај ТЦ Plaza (поранешно "Беко") видов еден телескоп кој чини 5830 денари заедно со ногарките, што е многу прифатливо за мене. Телескопот ги има следните ознаки и карактеристики: KONUS KJ-6, Refractor 60mm F800-f/13, па би сакал да ми кажете дали е доволно добар за почетник и дали ја оправдува својата цена. Исто така, би предложил да објавите статија-тест на сите модели на телескопи кои постојат на нашиот пазар (како што повремено правите за аудио и компјутерски компоненти).
Се надевам дека ќе одвоите време и наскоро ќе ми одговорите.
Милан Поповски
Ви ја исполнуваме желбата - еве тест на телескопот Konus KJ-6! Цената на телескопот Konus KJ-6 е навистина многу поволна, но тој има неколку сериозни недостатоци во механичките делови - кои се многу чести кај вакви евтини (најевтини!) производи. Ако имате вешти раце (и алат), ќе можете да направите неколку преправки и би требало да добиете прифатлив телескоп за почетник.
Главниот проблем кај овој телескоп е механизмот за фокусирање: малата цевка (на која има запчеста летвичка за фокусирање и на која се става окуларот) има за околу 2 mm помал дијаметар од лежиштето!!! Така, фокусирањето и држењето на објектот во видното поле е практично невозможно! Единствено решение е да се уфрли нешто меѓу таа цевка и лежиштето, со што малата цевка нема да може да се ниша радијално, а истовремено нема да пречи на лизгањето на цевката аксијално (напред-назад) при фокусирањето. Прво што ми паѓа на памет е на малата цевка да се залепат надолжно две-три пластични ленти, кои ќе овозможат правилно движење на цевката. Ова е само предлог, кој не е изработен и тестиран - резултатите проверете ги вие! Јас само имав можност половина час (ноќе) да го имам во раце (и на око :-) овој телескоп - доволно да ги воочам недостатоците, но недоволно време да испробам некое решение за проблемите.
Вториот проблем е квалитетот на монтажата, поточно - движењето околу двете оски. Монтажата е азимутална, но тоа не е голем недостаток за вакви мали телескопи - поголемиот проблем е тоа што фината регулација во вертикалната рамнина (околу хоризонталната оска) исто така е изведена непрецизно. Имено, фината регулација е изведена со едно тркалце со внатрешен навој, кое се навртува во една прачка со надворешен навој. Проблемот е повторно во големата "луфта" меѓу навоите. Неопходно е да се нареже нов, прецизен комплементарен навој на прачката и на тркалцето (а можеби ќе треба и нова прачка и тркалце?). Металниот прстен кој е прицврстен на тубусот и во кој се лизга прачката не е добро фиксиран на тубусот (се клати), така што и за него ќе треба да се најде некое решение.
Понатаму, воопшто нема фина регулација за движењето во хоризонталната рамнина (околу вертикалната оска)! Вообичаено решение е полжавест пренос (редуктор) и сајличка, но тоа овде го нема. Насочувањето кон небеските тела и нивното следење треба внимателно и трпеливо да се прави директно со рака - со придвижување на тубусот, со правовремено отпуштање и затегање на винтот кој ја стега вертикалната оска.
Квалитетот на објективот е добар, окуларот од 50х е прифатлив, додека окуларот од 100х има забележлива дисторзија (засилена и од тоа што не можев да го поставам во оската на објективот, заради претходно објаснетите проблеми). И двата окулара покажуваат паразитни рефлексии ("духови") и забележлив хроматизам, но за таа цена и не може да се очекува нешто повеќе. Зелениот филтер (со ознака "Moon") слободно можете да го фрлите во ѓубре.
Ако мислите дека ќе можете да ги решите претходно објаснетите механички проблеми, тогаш Konus KJ-6 е прифатлив како телескоп за почетник.
Владимир Филевски
Почитуван уреднику и соработници на ЕМИТЕР!
Ве поздравувам сите и сакам да кажам само едно нешто. ЕМИТЕР почна како списание кое се занимава со електроника и сите придружни области, потоа почна да се занимава и со други области, со што лично јас сметам дека направи чекор напред, но поради новите статии се намали бројот на старите статии од областа на електротехниката. Затоа ако сакате вашето списание да биде најчитано во Македонија искрено Ве советувам да го направите од видот на поранешниот југословенски САМ, во кој покрај теоретските излагања имаше и практични примери од областа на науката, но, што е уште поважно, од областа на домаќинството и куќните апарати. Јас искрено сметам дека во Македонија, па ни во екс-ју просторите не постои таква литература, а постои голем интерес за неа.
Со почит,
Атанас Миланов
Ви благодарам на пофалбите и предлозите. Како што објавив уште во уводникот во јануарскиот број од 2002 г. (првиот со новата концепција), планираниот концепт на ЕМИТЕР опфаќа теоретски написи, информации, прикази, практични совети и проекти за самоградба од разни области на науката и техниката, со посебен акцент на модерните технологии. Со други зборови кажано, ЕМИТЕР е замислено да биде списание кое во себе ќе го обединува концептите на едно списание за самоградители и "домашни мајстори" (како хрватскиот САМ), списание за популаризација на науката (како бившојугословенската ГАЛАКСИЈА) и списание за електроника и информатика (како европскиот ELEKTOR или британскиот Everyday Practical electronics).
Се сложувам дека во ЕМИТЕР недостасуваат темите кои беа типични за САМ, но оваа состојба е резултат главно на две причини:
1. Не постои никаков одѕив за соработка од страна на фирмите кои се занимаваат со трговија и одржување на куќни апарати, бела техника и електрични алати, иако редовно се обраќаме до нив со такви понуди.
2. Стручните лица, кои добро ја познаваат таа проблематика (инженери, сервисери, хобисти...), на кои сме им понудиле да пишуваат написи од тие области не биле заинтересирани за соработка, најчесто со образложение за презафатеност.
И покрај овие лоши состојби ние и понатаму ќе вложуваме напори што почесто да ги застапуваме темите за "домашните мајстори". Се надевам дека во иднина ќе имаме поголем успех и на тоа поле.
Што се однесува до забелешката дека во сегашниот ЕМИТЕР е намален бројот на написи од областа на електрониката во однос на стариот ЕМИТЕР, тука морам да кажам дека не сте во право - така само ви изгледа, затоа што сега ЕМИТЕР има многу повеќе страници и многу повеќе теми. За ова повеќе се осврнав во уводникот од бројот 9/03, па ве упатувам да го препрочитате.
Слободан Таневски
Почитувани,
Иако ЕМИТЕР го следам од првиот број, досега се немам јавено со писмо. За ова мое јавување ме поттикна написот "Луѓе на Месечината – лага или подвиг" од ЕМИТЕР 9/04. Сомневањата за тоа дали луѓето стапнале на Месечината или не, не се нови. Се сеќавам дека уште во годините кога луѓето ги правеа првите чекори по Месечината во тогашните списанија имаше разни негирања. Но, и тогаш како и денес, тоа го правеа разни нестручни луѓе, сензационалисти, па дури и обични манипулатори.
Во годините кога луѓето ја освојуваа Месечината јас бев во основно училиште и со голема возбуда ги следев тогашните случувања. Исто и тогаш имаше недостиг на литература или списанија кои би ја популаризирале науката и техниката. Во тоа време излегуваше "Космоплов" кој јас со големо нетрпение го очекував да го купам, а понатаму почна да излегува "Галаксија". Кога ќе се сетам на тие денови и ќе ги споредам со денешните, можам да кажам дека скоро воопшто се нема променето односот на државата кон популаризацијата на науката и техниката. Исто и во школството и во образованието малку се популаризираше науката. Затоа со ова писмо сакам да ви изразам поддршка за вашите напори во популаризирањето на науката која не е сфатена како догма, туку онаа наука што ќе им помогнале на луѓето во натамошниот развој. Мислам дека сите соработници во ЕМИТЕР се стручни и компетентни луѓе кои имаат големи познавања од областите за кои пишуваат. Посебно би го издвоил господинот Владимир Филевски кој ме воодушевува со своето знаење, стручност и сестраност.
Затоа продолжете така со својата работа, вистина и фактите секогаш победуваат и се докажуваат во секојдневниот живот, а разните незнајковци, сензационалисти и сеачи на магла остануваат во заборав.
Ви пожелувам успех во понатамошната работа,
Ѓорѓи Сидеров
Голема благодарност за искажаните пофалби и поддршка. Се надевам дека преку ЕМИТЕР ќе се дружиме уште многу години.
Слободан Таневски
Ве молам доколку немате реален текст за рубриката ИНФОРМАТИКА да не ставате повеќе вакви боси текстови како што е "Како да го уништите сопствениот компјутер" во Е 9/04.
Затоа што и вие самите во вашето списание имате реакција на текстот од ФОРУМ "Луѓе на Месечината – лага или подвиг" каде што пишувате за изнесените невистини во врска со нивниот текст, а вие сте оние што све знаат и само ги поправаат наведените невистини. Луѓето биле на месечината и тоа е факт. Меѓутоа да се пишува како компјутерите не треба да се чистат со воздух и дека тоа доведува до оддувување на чиповите, баш би сакал да го видам тоа 8 светско чудо или како некој на своето PC, кое го работи секојдневно, има поставено адам како декор во станот.Трошките од леб во флопито се невозможна работа, освен ако имате мало дете по дома, па да ви направи некоја таква глупост, а мониторот поставен над вашиот компјутер, како да сака да каже дека десктоп куќиштата се непотребен мебел на масата. И уште многу други ситни забелешки. Ве молам бидете поозбилни или овие текстови сместете ги во некоја ХУМОР рубрика, а не вака.
Иначе сè на сè сте ок, имате добри и интересни работи во весникот и опфатени ви се голем број на теми од науката и техниката.
Поздрав !!
Леон Николов
Написот "Како да го уништите својит компјутер" на шеговит и алегоричен начин се занимава со активностите коишто ги прават многумина корисници на компјутери, несвесно придонесувајќи за оштетување, па дури и уништување на сопствениот комјутер. Сите оние кои малку повеќе се занимаваат со компјутерите, особено сервисерите, биле сведоци на случаи какви што се опишани во текстот, од користење на куќиштето како полица за сè и сешто, до јадење и пиење над тастатурата, па сè до изместување на чипови и конектори при "стручно" чистење на внатрешноста со јак компресор или јака правосмукалка. Резултатите од нашата мини анкета укажуваат дека овој напис наиде на одличен прием меѓу читателите, што значи дека повеќето правилно ја сфатиле неговата поента: "немојте да ги правите кажаниве работи за да не си го уништите компјутерот".
Слободан Таневски
Најнапред здраво на сите од редакцијата и голем поздрав за она што го правите со ЕМИТЕР. Списанието ви е супер, иако имам мала забелешка. Јас сум прилично млад ваш читател (21 год). За ЕМИТЕР дознав дури во втора година средно. Од тогаш навака се трудам да ги имам сите броеви, иако тешко ми оди. Кога прв пат дознав за списанието бев мало дете што го интересираа други работи, нели во средно - електро, каде децата бараа играчки во списанијата за електроника. Сега ме интересираат други работи што ги наоѓам во списанието. Единствен проблем ми се речениците од типот: "За компресиони зв. кутии прочитајте го написот во ЕМИТЕР 5/95". Да речеме дека сум јас доволно стар за да ги имам тие броеви, но што е со нашата младина? Иако ЕМИТЕР е месечно списание и немате никаква обврска кон реиздавање на броеви, сепак неговата недостапност е проблемче за читателската публика (барем на таа околу мене). Ете, толку од мојата забелешка.
Сега ќе се префрлам на она што ме мачи. Јас се нафатив на проектот Транс 8. Супер, детето ги направи кутиите и стигна до проблемот наречен дампирање. Ми се чини дека сега му се обраќам само на Филевски. Прашањето е следново: според цртежот во списанието од средината на косата преграда до крајот на отворот (од позади) има 90 mm. Кога ке одбиеме некои 8 mm од дебелината на иверката од преградата и уште 16 од задната иверица, остануваат некои 70 mm. Прочитав дека треба 700 грама од волната за дампирање. Кога ќе се скрои, се добива материјал кој е дебел (висок) 20 до 30 mm. Од двете страни кога ќе се нанесе волна, го затвараат отворот од задната страна на звучникот скоро целосно (останува само некои 10 mm). Прочитав дека треба волната да се распореди со "рамномерна густина". Што значи тоа? Да ставам повеќе материјал во поширокиот дел, а помалку во потесниот дел, па да добијам некоја своевидна рамна "цевка"? Тоа не ми изгледа логично поради тоа што косата преграда ќе стане "рамна", а ако требаше да е таква ... ќе беше таква :).
Второ прашање: не знаев дека ќе водам толкава битка со волна ... ми се расслојува, се распаѓа, се партали. Треба ли со нешто да се залепи за зидовите на кутијата? Ја исеков (волната) во парчиња долги колку самиот звучник и соодветно широки па така (не) ми оди процесот на полнење.
Добро, мислам дека поставив доволно прашања. Ах ... да .. уште нешто. Би прашал кој засилувач најдобро би се "дружел" со овие звучници.
Благодарам на вниманието и однапред благодарам на вашиот договор. Искрено ваш,
Александар Голубовски
Брошурата за звучници е во (рана) фаза на подготовка, така што и помладите читатели наскоро ќе можат да ги добијат сите потребни податоци за самоградба на звучници. А до тогаш, од редакцијата на ЕМИТЕР во секое време можат да се нарачаат стари примероци од ЕМИТЕР (или нивни фотокопии).
Поради нормалните разлики во густината на самиот материјал за дампирање (друг производител, на пример), можно е да има отстапки, па кај вас се случило материјалот да не стигне да го пополни целиот простор. Проблемите со дампирањето можат лесно да се решат - едноставно расчепкајте го малку материјалот, за да го пополни целиот простор. Најпосле, добро решение е и да додадете малку повеќе материјал за дампирање - нема ништо лошо да се случи, напротив. Оние пропишани 700 грама (по кутија) не се задолжителни, може и повеќе.
Материјалот треба рамномерно да се распореди - тоа значи дека во поширокиот дел од "цевката" треба да се стави повеќе материјал, а во потесниот помалку. Нема никаква потреба од лепење на материјалот на ѕидовите, тој самиот се држи заради еластичниот притисок на материјалот врз ѕидовите од кутијата.
Импедансата на бас-звучник вграден во трансмисиона линија е најрамна од сите типови звучни кутии, така што ваквите звучни кутии се најмал проблем за засилувачите. Едноставно приклучете каков било засилувач. Ако сакате гласна музика, ќе ви биде потребен засилувач со поголема моќност, бидејќи Trans 8 имаат мала ефикасност (тоа нема врска со трансмисионата линија). Задолжително употребете ја свртницата со дополнителниот калем за бас-звучникот, чијашто исправна шема ја објавивме во рубриката "Писма, дополнувања, исправки" во ЕМИТЕР 5/04.
Владимир Филевски
Почитувана Редакцијо,
Имам едно прашање: Го изработив Стерео засилувачот од ЕМИТЕР, со додавање на Лауднес контролата. Кога го пуштив прв пат, проработе, но едниот канал работи нормално, а другиот работи два пати послабо и не ги репродуцира длабоките тонови. За предзасилувач на засилувачот како и на лауднес контролите го користам ИК NE 5532, бидејќи вие нагласивте дека е поквалитетен. Исто така го додадов филтерот за ниски тонови и 150 ватниот мостен засилувач со TDA 7294, но тие си работат нормално и многу сум задоволен. Во што е проблемот?
Миодраг Голубовиќ
преку e-mail
Прашањето како што го разбрав е дека, едниот канал од Вашиот штотуку изработен "стерео засилувач со голема моќност" објавен во ЕМИТЕР бр.7-8/04, дава двапати помала излезна моќност на едниот канал. За да откриете во што е проблемот треба да направите мало тестирање, а тоа се состои во следното: Излезот од тон блендата од исправниот канал треба да го споите со влезот на излезниот засилувач кој дава на излез два пати помала излезна моќност. Ако после оваа постапка и понатаму излезната моќност е два пати помала во однос на другиот канал, тогаш проблемот е во ИК LM3886T (треба да се замени). Ако пак со оваа постапка излезот добро работи, тогаш проблемот е во "тон блендата". Прво проверете дали сите компоненти се добро залемени на соодветните места според слика 7. Ако тоа е во ред проверете да не има некои непредвидени куси врски или прекини на плочката. Ако и тоа е во ред тогаш е неисправен некој елемент во тон контролата, а тука најсомнителни се потенциометрите – ако тие се неквалитетни или стари тогаш можно е во некоја позиција лизгачот да се одвојува од отпорната лента и со тоа да ја пореметува работата на колото. Решението е да употребите поквалитетни потенциометри.
Славко Стојковски
Почитувана редакцијо,
Списанието ви е "ОК" и ви посакувам и понатаму вака да продолжите.
При изработката на проектот "Комплетен стереозасилувач со голема моќност" од ЕМИТЕР бр. 7-8/04 наидов на некои проблеми:
1. Делот околу набавката на електронските компоненти и ППК комплетно го завршив. Кутија ми направија во една работилница за лим, но се јави проблем околу набавка на трансформаторот. За трансформатор од 300W/2x26Vac ми бараат 2000 денари. Дали овој трансформатор е соодветен за засилувачот и дали можам да го искористам "DC step-ap конверторот на напон" од ЕМИТЕР бр.1/04 наместо трансформаторот за напојување на засилувачот и на кој начин?
2. Имам направено и VU-метар кој се напојува со напон од 10 до 15V и струја од околу 100 mA. На кој начин да го поврзам со напојувањето од засилувачот ?
3. Имам изработено и "Електронски термостат за контрола на вентилатор" од ЕМИТЕР бр. 5/95, кој се напојува со напон од 12V. Ме интересира исто така на кој начин да го поврзам со напојувањето на засилувачот?
4. Дали би можеле во некој од наредните броеви на ЕМИТЕР да објавите напис за "Полнач за Ni-Mh батерии", и ако имало во некој од предходните броеви, дали би можеле да ми испратите електрична шема?
5. Моја желба, а сигурен сум, и желба на поголем број на читатели е да издадете книга со електрични шеми со упатства за нивна изработка.
Александар Георгиевски,
с. Стајковци – Скопје
1. Трансформаторот кој сакате да го купите е соодветен, но е предимензиониран, бидејќи како што нагласив во проектот под поглавието "напојување", за напојување на овој засилувач потребен ви е трансформатор од 150VA/2x26Vac, но не мора стриктно да се држите на овој секундарен напон (погледнете ги дијаграмите за напојување на слика 3 за оптоварување на излезот од засилувачот од 8 оми). Ви препорачувам да се прошетате по скопските продавници за електронски компоненти во кој ќе најдете трансформатор (како што направивме и ние во нашиов проект) со напон на секундарот од 2x24Vac и струја од 5A, кој ќе го купите по цена од околу 1000 денари. Овој трансформатор има малку помал секундарен напон од предложениот, но затоа е два пати поевтин од тој кој ви се нуди. DC Степ-ап конверторот на напон не може да се користи како замена за трансформатор – тој, како што веќе е кажано во текстот, служи за добивање на повисок еднонасочен напон од некој низок еднонасочен напон.
2. и 3. Поврзувањето на напојувањето на VU-метарот и Електронскиот термостат за контрола на вентилатор ќе го направите според електричната шема дадена на слика 1. Како што се гледа од шемата таа се состои од еден интегриран стабилизатор на напон (IC=7812) за 12 V и два паралено поврзани кондензатори C1 и C2 на излезот (OUT) со масата (GND). Влезот (IN) на овој стабилизатор се поврзува на плусот од напојувањето (+), а масата (GND) со масата од напојувањето на засилувачот (погледнете ја слика 6 во ЕМИТЕР 7-8/04). Треба да обратите поголемо внимание при монтажата на овој стабилизатор во металната кутија каде што ќе го монтирате и стереозасилувачот со голема моќност. Имено, металната плочка на стабилизаторот е поврзана со плусот, па затоа тој треба да се изолира од лимената кутија, а тоа ќе го изведете со помош на изолатор (лискун или сл.), изолаторска подлошка и завртка со навртка. Помеѓу реброто и кутијата нанесете термопроводна паста за подобро одведување на топлината.
4. Полнач на за "Полнач за Ni-Mh батерии", досега не е објавен во ЕМИТЕР, но ќе се потрудиме предлогот да биде реализиран во некој од следните броеви.
5. Што се однесува до вашето прашање за книга со шеми во издание на ЕМИТЕР, може да ве известиме дека таа е веќе во подготовка и можете за некој месец да ја очекувате во продажба.
Славко Стојковски и Слободан Таневски
Pages
Пишувајте ни, прашувајте, коментирајте, предлагајте...
Ако имате некоја критика, пофалба или предлог за списанието, ако имате прашање или коментар во врска со некој напис објавен во ЕМИТЕР, ако имате прашање од која било област од науката и техниката или, ако имате проблеми со изработка и поправката на вашите уреди и системи – слободно обратете ни се.
Потрудете се вашите писма да бидат кратки и прецизни, но внимавајте да ги содржат сите неопходни информации во врска со темата. Ќе се потрудиме нашиот одговор да го добиете што побрзо (преку e-mail), а најинтересните писма, заедно со нашиот одговор ќе бидат објавени во списанието и на нашиот Веб портал (https://emiter.com.mk/pisma). Во секој број едно писмо ќе биде прогласено за “Писмо на бројот“ и неговиот автор ќе биде награден со полугодишна претплата на ЕМИТЕР.
Напоменуваме дека сите писма што ќе пристигнат на адреса на редакцијата сметаме дека се испратени со цел да бидат објавени. Редакцијата го задржува правото да ги обработи писмата што ќе бидат објавени, во насока на лектура, појаснување и кратење. На крајот, мора да напоменеме дека, и покрај нашата желба, сепак, не сме во можност да одговориме на сите писма и прашања.