Интегрираното коло NE555 е предвидено за генерирање и обработка на временски променливи напони и импулси, па затоа се нарекува и интегриран тајмер. Тоа е едно од најстарите и најшироко распространетите интегрирани кола – го произведуваат речиси сите производители на електронски компоненти. Притоа, зависно од производителот, буквите во ознаката можат да бидат различни, но бројот 555 укажува дека станува збор за истото интегрирано коло. Во овој напис ќе прикажеме како, на едноставен начин, може да се пресмета и направи генератор на импулси (астабилен мултивибратор) со помош на ова коло.