Стационарните електронски уреди речиси редовно се напојуваат, односно се приклучуваат на градската мрежа. Исклучок се прави кај посебните склопови кои во себе содржат тиристори или тријаци, кои директно се напојуваат од градската мрежа, т.е. на напон од 230V, а останатите електронски уреди бараат (изискуваат) еднонасочно напојување. Поради тие причини, пожелно е секој електроничар без разлика дали е почетник или е во напредна фаза во својата работилница да поседува "Стабилизиран исправувач", со можност за континуирана промена (регулација) на излезниот напон. Во проектот што ќе го проследите, ви се нуди еден таков стабилизиран исправувач кој се одликува со континуирана регулација на напонот од 3 до 30V и со излезна струја до 2,5A. Проектиран е така да можете да го изработите со минимални вложувања и со основни предзнаења од областа на електрониката.