Акустички прекинувач е електронски склоп кој се користи за управување на најразлични уреди со помош на звук. Најкарактеристичен пример за неговата примена се касетофоните и диктафоните кои го снимаат звукот или разговорот само за време на неговото постоење, со што значително се штеди медиумот за снимање било тоа да е магнетна лента или мемориска картичка. Бидејќи повеќето касетофони и магнетофони поседуваат посебен приклучок кој се користи за нивно далечинско управување, со едноставно поврзување на акустичкиот прекинувач со овој приклучок, лесно можеме да ја автоматизираме нивната работа и во наше отсуство. Освен ова, акустичкиот прекинувач може да влезе во состав и на други уреди како што се: беби аларми, сигурносни аларми, фотоапарати, играчки за деца и многу други.