Пред некое време често се случуваше некому да дојде телефонска сметка од неколку стотици па и илјади германски марки, иако сопственикот на телефонскиот број не потрошил толку импулси. Штосот беше во тоа што некои луѓе во доцните вечерни часови ги отварале телефонските разводни кутии и на произволно избран телефонски број закачувале телефонски апарат (популарно наречен Beigebox) и бирале некој од броевите 0500XXXXX или некој интернационален број. Процедурата за докажување, во пошта, дека импулсите не сте ги направиле вие е многу комплицирана и најверојатно завршува со тоа што ќе бидете принудени да ја платите сметката или да ви го исклучат телефонот. Затоа најдобро е да знаете кога некој е закачен на вашата линија, за да можете навреме да реагирате. Уредот што ќе го претставиме го прави токму тоа - сигнализира кога некој ја користи вашата линија.