За да го подобрат домашниот амбиент, а и да се добие чувство како да се наоѓате на некои тропски острови во Пацификот во овие зимски тмурни денови, некои наши читатели во својот дом поседуваат аквариум во кој "безгрижно" пливаат убави тропски рипчиња. Погледот насочен кон аквариумот навистина дејствува на нас многу пријатно и смирувачки. За сè да биде во ред, односно за убавите тропски рипчиња безгрижно да си пливаат во аквариумот, а ние со таа слика психички да се одмориме, треба да ги храниме со соодветна храна и тоа е сè. Многу едноставно ќе рече некој, но не е во право, за сè да биде во ред треба во водата да обезбедиме и довод на кислород, а еден од поважните услови е температатурата на водата во аквариумот да е иста или слична со температурата на водите каде што претходно рипчињата живееле, поточно нивните предци. За рипчињата од тропските мориња таа треба да биде околу 25±1ºC, но за некои други (морски или слатководни) рипчиња оптималната температура може да биде од 22 па до 30ºC, но тоа најдобро го знаат самите акваристи. За загревање на водата се користи електричен грејач со одредена моќност која одговара на големината на аквариумот. Грејачот располага со регулирачки термостат со чија помош ја нагодувате температурата на водата. За да дознаете која е нагодената температура на водата во аквариумот, ќе ви биде потребен термометар. Поради тие причини, во овој проект е дизајниран интересен термометар кој преку светење на одредена диода/ди на едноставен визуелен начин ви ја покажува температурата на водата во вашиот аквариум. Како тој изгледа можете да видите на фотографиите од изработениот прототип. Овој термометар ќе ви овозможи да не ги прегреете или да не ги смрзнете вашите миленичиња!