Со појавата на специјализираните интегрални кола, изработката на квалитетен генератор на функции стана значително полесна. Изборот на овие кола не е мал, но две од нив секако се најпопуларни и истовремено најдостапни. Тоа се колата XR 2206 (производство на EXAR) и ICL 8038 (производство на INTERSIL). Во овој проект се решивме за изработка на генератор на функции базиран на колото XR 2206.

И покрај тоа што се работи за едноставно, може да се каже класично решение, генераторот на функции FG - 95 ги опфаќа практично сите видови испитни сигнали: синусен, триаголен, правоаголен, пилест и низа од импулси. Фреквенцискиот опсег се движи од 1Hz до 100kHz (поделен во 5 подрачја), што покрива околу 90% од потребните испитни фреквенции. Фреквенцијата се нагодува со два потенциометри (за грбо и фино нагодување), а се отчитува на вграден дигитален фреквенцметар со 6 цифри. Кај импулсниот и пилестиот сигнал, со посебен потенциометар, може да се менува односот на полупериодите од 0,1 до 9. За нагодување на амплитудата има потенциометар и атенуатор од -20dB, како и потенциометар за додавање на офсет (DC напон на сигналот). Генераторот е предвиден за стационарна употреба со напојување од градската мрежа, а неговите технички карактеристики се дадени во табелата.