Иако оваа технологија веќе е претставена на читателите на Емитер веднаш при нејзиното појавување на пазарот (втор квартал на 2008 – Емитер бр. 4/2008), јас уште еднаш тука ќе ги подвлечам нејзините основни карактеристики.
BASH технологијата, сопственост на еден од коминтентите на СТ Микроелектроникс – Индиго (Indigo), претставува потврдена класа на излезни аудиозасилувачи. Таа е симбиоза на квалитетите на AB и D-класите истовремено. BASH технологијата го има истовремено квалитетот на репродукцијата кое го има AB-класата и ефикасноста на D-класата. Тоа значи степен на полезно дејство до 90%, мали изобличувања, голем пропусен опсег и висока верност на репродуцираниот аудиосигнал, одлика на најквалитетните решенија во оваа област.
STA575 е стерео излезен аудиозасилувач во мостна конфигурација базиран на BASH архитектурата со моќност од 2x100W RMS. Тој има активни предзасилувачки степени со голем динамички опсег. Во него се вградени компресори кои ја регулираат повратната врска со надворешни елементи кои може да се нагодуваат, како и прецизни електронски исправувачи – претворувачи во апсолутна вредност на сигналот кои понатаму се користат за управување со работата на BASH конверторот. Тој има софистицирана повеќекратна заштита која се одликува со:
- секвенција за вклучување / исклучување;
- пропорционален прекуструен ограничувач на BASH конверторот;
- заштита на излезните транзистори од прекумерна моќност;
- термичка заштита на излезните транзистори;
- ограничување на максималната излезна струја;
- заштита од прекумерен напон на напојување.