Два или повеќе компјутери во еден дом поврзани во мрежа веќе одамна се сосема вообичаена појава. Наспроти нив се ТВ-приемникот и уредите за домашно кино. Меѓусебна комуникација? Со посредство на сопственикот, кој треба да донесе диск со видеодатотеки и фотографии, а кој претходно треба да го сними.
Мултимедијалните ПЦ-а со вграден ТВ/ФМ-тјунер се едно од решенијата. Но, практичноста ја нарушуваат неколку аспекти. Прво - потребата од безжични тастатура и глувче, кои треба секогаш да бидат при рака, а и некаде да бидат одложени кога не се употребуваат (но, пак, при рака). Второ, LCD ТВ-приемниците со поголема дијагонала се попожелни отколку класичните ТВ-приемници со оглед дека треба да служат и како монитори за секојдневното работење со компјутерот. Тука е и разликата во работните резолуции, која кај ТВ-приемниците е 720x576 пиксели. Трето, треба да се внимава дали имаат поддршка за целосен HD-формат (Full HD, 1080i/p). HD Ready (720p) моделите веќе се застарени и со ограничена употребна вредност. И четврто, времето на целосната искористеност на LCD ТВ-приемниците допрва доаѓа, така што нивната цена во моментов е доста висока за нашиот стандард. Поради тоа, старите добри катодни ТВ-приемници сè уште се во голема мера присутни во домовите и тоа како главен, не само како втор ТВ-приемник.
Портабл мултимедијалните уреди се без овие, да ги наречеме така, ограничувања. Поддршката за различни работни резолуции е сè поприсутна како се појавуваат сè понови и понови модели, а опцијата за мрежно поврзување отвора дополнителни можности.
Verbatim како бренд нема потреба посебно да се претставува. Тоа што е интересно е проширување на полето на дејствување, така што во последно време на пазарот се сè поприсутни и екстерни хард дискови чиј потписник е оваа компанија.
Појавата на компактни мултимедијални уреди е логичен след на настаните. MediaStation HD DVR ја продолжува приказната започната од претходниот модел, MediaStation PRO, кој постигна огромен успех на пазарот и беше прогласен како најдобар на пазарот. Дали е и негов наследник, ќе видиме во продолжение на текстот.