Изгледа навика ми стана да тестирам засилувачи. За разлика од претходно, овде се работи за компаративен тест на два висококвалитетни интегрирани засилувачи. Во растечкиот тренд, кога заколнатите поборници на раздвоените комбинации (предзасилувач/засилувач) полека, но сигурно му го отстапуваат должното место на интегрираниот склоп, не можев а да не ве запознаам со овие два навистина извонредни уреди, кои доаѓаат од врвни производители од земјата на изгрејсонцето. Проценувајќи го моментот како мошне погоден за враќање на сцена на интегрираните засилувачи во класата на високо квалитетни (речиси high–end) и нешто покомерцијални (со релативно достапни цени, но сепак способни за високоверна и квалитетна репродукција) уреди, повеќе светски компании го засилија темпото на издавање на компоненти во класата која до скоро (посебно на американскиот пазар) се сметаше за минато.