Како што видовме во минатиот број, најголемиот дел од проблемите при лемењето потекнуваат токму од преголемото загревање ва врвот на лемилото, затоа решението треба да го бараме во намалувањето на ова непотребно прегревање, а, сепак, врвот да остане доволно топол за да може да лемиме. Колото кое ви предлагаме да го изработите треба да биде додаток за обично лемило без автоматска регулација на температурата. Овој склоп, од една страна, се приклучува на мрежен напон, а од друга, на лемилото и (со еден спроводник) за држачот на лемилото. Склопот во основа претставува коло за регулација на моќност на потрошувач со тријак. Идејата е следната: кога лемилото е поставено на држачот склопот кон лемилото испорачува намалена моќност која може самите да ја определиме со потенциометарот во зависност од тоа каков лем користиме (со кој процент на калај). Кога лемилото ќе го одвоиме од држачот со цел да залемиме некој спој, тогаш склопот кон лемилото испорачува максимална моќност (номиналната моќност на лемилото). На тој начин кон лемилото се испорачува максимална моќност само кога лемиме, односно кога врвот најмногу оддава топлина и најмногу се лади. Се разбира, од овој склоп не може да очекувате резултати како кај лемилата со автоматска регулација, но бидете сигурни дека врвот на вашето лемило многу подолго ќе трае и лемењето со вашето лемило ќе биде многу поквалитетно од порано.