Во секој случај, изработката на картингот ТоГи 1 е релативно сложена, т.е. не се работи за едноствен склоп. За да се зафатите со изработка и склопување на картингот кој е претставен во овој серијал, потребно е да сте љубители на машинството и на автомобилите, да не речам "да ви тече бензин во вените", да имате смисла за решавање на конкретни машински и занатски проблеми, да умеете да се снајдете во конкретна ситуација. Добро да се размисли за она што се прави и никогаш да не се работи "на слепо", т.е. секој чекор, секоја акција при правењето на картингот добро да е обмислена и квалитетно изведена. Во никој случај да не се брза. Цртежите добро да се проучат, да се држите до советите, забелешките, напомените и упатства што ги имаме изложени во текстов во сите четири продолженија. Оние зафати кои ќе ги правите во сопствена режија да бидат во духот на науката за машинството. Работете совесно, педантно, без брзање и применувајте ги сите хигиенско – технички заштитни средства кои се неопходни за определените занатски дејствија при изработката на картингот. Ризикот од неуспехот, како и задоволството од успехот се ваши. На крај, ги повикуваме сите оние што ќе го изработат картингот ТоГи 1, во прикажаната или во некоја своја модифицирана верзија, да ни се јават и да ни испратат фотографии од него, кои со задоволство ќе ги објавиме во ЕМИТЕР.