И она што изгледаше како пилот-проект на човекот кого го познаваме долго време и со кого сме се сретнале многупати, во многу пригоди, делејќи го истиот град, истите улици, прерасна во препознатлив бренд за којшто сä почесто се зборува меѓу луѓето кои го ценат добриот звук, и тоа не само локално.

Иако изминативе години внимателно ја следевме неговата работа и развој, случувањата и промените во Емитер не спречија порано да ја направиме оваа презентација. Но конечно, со отворањето на аудио салонот Аудио култура, сите коцки се склопија и дојде “вистинското време“ на читателите на Емитер да им го претставиме брендот Теохаров и неговиот идеен творец.

Со Веселин Теохаров разговаравме во извонредно опуштена атмосфера во новоотворениот аудио салон, мошне интригантно наречен “Аудио Култура”, последниот производ реализиран од ра­бо­тил­ницата на Теохаров.

Овој простор кој е замислен да биде многу повеќе од продавница за аудио компоненти и кој ќе биде предмет на засебен осврт на страниците на Емитер, претставуваше идеално место за раз­говор со младиот конструктор. Опкру­жен со своите креации кои сами збору­ваат за ориентацијата на Теохаров кон врвен инженеринг и квалитет, и токму со квалитетот во негова апсолутна смисла и го отпочнуваме разговорот.

Интересно е што принципот на висо­ко­верната репродукција, кој беше засно­ван на подобрување на својствата на уредите дизајнирани за оваа намена, вклучувајќи ги и носачите на звук, кој кон крајот на минатото столетие беше разнишан од самата индустрија. Таа, пак неможејќи подобро поради технолош­ките ограничувања, ја нудеше музиката во формати со (мошне) низок квалитет со цел да ја направи подостапна, а со тоа и попривлечна за консументите. Тоа создаде нови генерации за кои форма­тите со висок степен на компресија беа сосема нормални, а високоверната ре­про­дукција на аудио во домашни услови – “работа” од минатото. Денес стриминг­от на аудио со таканаречен квалитет за висока верност е стандард, музиката на винил воскресна; се појавуваат нови техники на снимање и репродукција на музика и аудио, генерално далеку над она што можело да се замисли, но по сè изгледа дека на најголем дел од луѓето едноставно повеќе не им е грижа. Мо­бил­ниот телефон е уредот преку кој се конзумира музика, а за мнозинството, безжичните boom-box-ви со Bluetooth ко­нек­ција се врвно достигнување во квали­тетната репродукција на звук.

Зошто “Теохаров” и зошто сега?

Веселин се согласува со насмевка, но верува дека постои и секогаш ќе постои група на консументи за кои реп­ро­дук­цијата на музика со висока вер­ност ќе биде еден од предусловите за квалитетно живеење. Токму за нив се наменети дизајнерскиот пристап и про­из­водите на Теохаров, за кој квалитетот е основниот мотив, двигател и цел од кој нема намера да отстапи.