Безжичен уред што ја собира изгубената енергија
Користејќи евтини материјали, инженерите од Универзитетот Duke осмислиле уред сличен на соларните панели со кои може да се собира изгубената енергија и да се претвора во електрична. Уредот по бежичен пат би ги претворал микробрановите сигнали во еднонасочна струја со која потоа можат да се полнат батерии на мобилни телефони и некои други помали уреди кои не бараат многу енергија за да функционираат.
Уредот ќе работи на сличен принцип како и соларните панели коишто светлосната енергија ја претвораат во електрична. Исто така, овој уред би можел да собира енергија и од други извори, како што се, на пример, сателитските сигнали, звучните сигнали или Wi-Fi сигналите.
Уредот ќе користи материјали што собираат енергија од разни видови сигнали во вид на бранови, а потоа со нагодување ќе биде приспособен за разни апликации. Досега работата е воглавно на теоретско ниво, но инженерите од Универзитетот во Duke тврдат дека не е далеку денот кога уредот ќе биде изработен за апликации за широка потрошувачка.
На пример, таков метаматеријал би се поставил на плафонот во одредена просторија за да собира “растурени и изгубени” Wi-Fi сигнали, а таа енергија би ја користеле за своите уреди оние што се во просторијата. Со додатни подобрувања и доработки, такви метаматеријали би можело да се вградуваат и во самите мобилни телефони, во таблети и друго, за да си се полнат сами!
Ловејќи енергија од сателитите коишто кружат околу Земјата, би можеле да се полнат со вакви уреди сензорските мрежи на оддалечени и непристапни места, како што се планините и пустините, тврдат инженерите од тимот што работи на овој интересен проект.
Калина С. Андонова