Посебен гостин на изложбата беше Претседателот на Република Македонија, д-р Ѓорге Иванов, голем аудиофил и вљубеник во музиката и аудиотехниката. Тој придонесе кон збогатување на изложбата со 6 експонати со ексклузивна вредност од својата домашна колекција. Се работи за засилувачи коишто тој самиот ги има изработено, но и старински радиоприемници што ги има репарирано и реставрирано, како и стари аудиофилски звучници. Во рамките на настанот, претседателот одржа и едночасовно предавање на тема "Потрага по совршениот звук", кое беше проследено со посебен интерес од студентите, кадарот на ФЕИТ и присутните гости.
Изложбата ја отвори деканот на ФЕИТ, проф. д-р Миле Станковски, кој нагласи дека Факултетот е еден од стожерите на техничките науки во Македонија. Аудиотехниката, како една од овие области, се негува на ФЕИТ уште од неговото основање. Институтот за електроника уште од 60-тите години на минатиот век ги покрива основите за градбата на речиси сите уреди во аудиотехниката, од ерата на електронските цевки, преку ерата на биполарните транзистори, па сè до дигиталните аудиосистеми.