Во сабвуферот Меркали 12 употребен е квалитетен (и скап) бас-звучник Инфинити Капа (Infinity Kappa) 120.3se, со номинален дијаметар од 12 инчи (305 mm) и импеданса од 4 W, наменет за сабвуфер за автомобил. Мембраната е метална со мат-сребрена боја, а периферната гумена спојка е со голема ролна. Со професионалниот уред за аудиомерења CLIO ги измерив Thiele-Small параметрите, од кои произлезе дека со него може да се направи компресиона (затворена) кутија со одличен квалитет. Кутијата за сабвуферот Меркали 12 има внатрешен волумен од 50 литри (dm3). Внатрешноста на кутијата е вкрутена со дополнителни летвички, а потоа целата внатрешност е дампирана со полиестерска “волна” која служи за полнење перници. Пропорциите на кутијата не се важни, па можете да се одлучите и за форма на коцка, како што гледате на фотографијата. Кутијата ја обоивме во светло сива боја, слична на бојата на мембраната на звучникот. Четирите црни точки блиску до аглите се лежишта за пластичните држачи за рамката со заштитно платно. На дното од кутијата поставени се 4 шилци, за да не “потскокнува” кутијата при гласно свирење. Од задната страна на кутијата, во дополнителна комора е монтиран засилувач од 250 W на 4 W, од кој се гледаат само ребрата од големиот алуминиски ладилник.