Човекот отсекогаш сакал да навлезе во тајните на нашиот Сончев систем и пошироко во вселената. Развојот на науката и техниката во последните неколку децении го овозможил праќањето до оддалечени планети на роботи со разновидни сензори кои вршат најразлични испитувања и резултатите ги праќаат назад до Земјата. Овде се вбројуваат испитувањето на составот на почвата, атмосферата и сл. Овие испитувања роботот ги врши "полуавтономно", т.е. со делумно управување од човекот. Постојаното управување со роботот е оневозможено поради недостигот на постојана комуникација со операторот на Земјата, поради што роботот треба да поседува вештачка интелигенција со цел автономно извршување сложени задачи.
Екипа од четворица студенти на Факултетот за електротехника и информациски технологии (ФЕИТ) составија ефикасен модел на овој вид роботи, кој освои прво место во конкуренција од седум екипи на меѓународниот натпревар "Хардвер и софтвер 2011" што се одржа во Нови Сад, Република Србија. Како основа е употребен роботот RP6, на кој му се додадени дополнителни сензори и GPRS-уред, со што е добиен робот кој ги има следните можности: препознавање на околината, исчитување информација од теренот, комуникација со оддалечен оператор и автономно движење со комбинација од механизми за навигација.