Во нашите простори се среќаваат најразлични типови огради и тоа: бетонски лиени столпчиња во барок стил, во најразлични форми, обични метални огради со главни елементи – плетена мрежа и ребраста арматура, кована ограда, панелна ограда, иноксна ограда и др. За каков тип ограда ќе се одлучиме, претставува прашање на сопствен вкус и подготвеност за инвестирање. Во овој текст ќе се задржиме на оградите кои се изработуваат од метал, односно ќе дадеме акцент на кованите огради, бидејќи денес тие наоѓаат најмасовна примена. Бидејќи станува збор за самоградба на ограда во овој текст нема да ги опфатиме иноксните огради, од проста причина што за нивна изработка ни е потребна специјална опрема, која ретко кој ја поседува во домашни услови (апаратура за тиг-заварување, полир-пасти и киселини, машини за полирање на заварот).