Кога зборуваме за LED диодите обично ние подразбираме дека тие се емитувачи на светлина со цел да се сигнализира активната состојба на некое струјно коло. Но, малку е познато дека тие можат да се употребат и како фотосензори, т.е. детектори на светлина. Уште помалку е познато дека тие истовремено можат да функционираат и како светлински извор и како светлински детектор во еден ист електричен склоп.
Основната идеја на таков склоп е LED диодата перманентно наизменично да влегува во два различни режима на работа и со тоа да извршува две различни функции: едната како светлински извор и втората како фотосензор, т.е. да емитува фотонапонска струја под дејство на амбиентната светлина. Електричната шема на таков склоп, во кој LED диодата е употребена така што наизменично ги извршува и двете наведени функции, е покажана во 2 варијанти: варијанта "А", каде склопот е дизајниран како ноќен индикатор, и варијанта "Б", каде склопот е дизајниран како дневен индикатор. Основата во двата склопа ја чини "интегралецот" 7555, всушност CMOS тајмер. И двата склопа се едноставни за самоградба, имено тие содржат само неколку евтини компоненти.