Лесно им е на аудиофилите со длабок џеб. Ако им треба навистина добар засилувач за слушалки, ќе го купат најквалитетното – засилувач за слушалки со излезен степен во чиста класа А. Лесно им е и на аудиофилите со помал буџет, но со повешти раце – ќе го направат засилувачот во класа А според проектот од ЕМИТЕР 6/2009, или нешто слично, и ќе заштедат значајно количество пари. Но, заедничко и за двете решенија е тоа што таквите засилувачи се, помалку или повеќе, гломазни и скапи. Сепак, не очајувајте – речиси еднакво добар звук се добива со добро проектиран засилувач со излезен степен во класа АБ, кој е многу поевтин и помалку габаритен. Ваков засилувач може да се направи во дискретна техника (со поединечни транзистори), или со некое добро интегрирано коло. Некои од најголемите светски производители на интегрирани кола се потрудија да направат евтини, но висококвалитетни "интегралци" од кои не би се посрамил ниту еден аудиофил. Еден таков пример е TDA1308, производство на NXP (огранок од Philips).