Во секое студио, било да станува збор за продукција/снимање на аудио и видео или, пак, за емитување радио и ТВ-програма во живо, често се јавува потреба за едновремено слушање на аудиосигналот од страна на повеќе учесници во тој процес. Во многу студија тоа е решено така што е употребен еден аудиозасилувач со средна моќност (вообичаено 2 x 10-50 W), на чиј излез (преку сериски отпорник) е приклучена разводна кутија со повеќе паралелно поврзани конектори за слушалки. На овој начин можат да се приклучат неколку десетици слушалки, но сепак ова е далеку од добро решение. Имено, регулацијата на јачината е една и заедничка за сите слушалки, а секој од учесниците во студиото има сопствен став кон потребната јачина на репродукција. Дополнителен проблем е тоа што ретко кое студио поседува повеќе парови од ист модел слушалки, па така различните модели на слушалки имаат различна осетливост и импеданса, што резултира со различно ниво на репродукција. Очигледно, решението на сите овие проблеми е ако за секој пар слушалки обезбедиме посебен мал засилувач со своја регулација на јачината, со цел секој учесник во снимањето/програмата да може индивидуално да си го нагоди саканото ниво на репродукција. Но ваквото идеално решение е скапо, па затоа во пракстиката се применува компромисно решение – најчесто тоа е уред со 4 до 8 стереозасилувачи за слушалки, при што секој излез е предвиден за приклучување на 2 до 4 пара слушалки. Ваквите комерцијално достапни студиски засилувачи за слушалки имаат цена од 50, па до 500 евра и повеќе, зависно од бројот на канали и од квалитетот. Купувањето готов уред е опција број 1 за повеќемина, но не и за нас – домашните мајстори (емитерџии). Заштедата е еден од мотивите, а другиот и поважниот е креативното задоволството што може да го даде само сопствено направениот уред. Токму затоа ви го нудиме овој проект за самоградба.