Топлински мостови се делови од обвивката на зграда каде што, како резултат на дводимензионалниот (2D) или тродимензионалниот (3D) карактер на пренесувањето на топлината, или внатрешната површинска температура е пониска а со тоа настанува кондензација или пак топлинските загуби се поголеми. Оваа дефиниција според важечките стандарди е модифицирана и гласи дека топлински мост претставува дел од надворешната конструкција на објектот во кој топлинскиот отпор значително се разликува од останатиот еднообразен дел.
Во контактите што ги имам со колегите проектанти на тема топлински изолации и пренесување на топлината, не ретко ќе слушнам дека нивниот проект во поглед на топлинските мостови е сосема коректен, односно со добрата топлинска изолација сосема ги исклучиле топлинските мостови. Дали ова нивно мислење е исправно и дали е можно да се проектираат објекти без топлински мостови? Одговорот е негативен, а доказот за тоа ќе го понудам на читателите во текстот што следува.