На денешен ден, пред точно 49 години, во 20 часот и 17 минути (UTC), вселенската мисија Аполо 11 успешно стигна на целта – на Месечината. Веднаш потоа, во командниот центар на НАСА одекнаа зборовите на Нил Армстронг: “Орелот слета”. По успешното слетување на месечевиот модул наречен “Орел”, двајцата астронаути го изедоа и првиот “месечев” оброк, a нестрпливата светска публика која го следеше директниот пренос од слетувањето на Месечината мораше да почека уште неколку часа за првиот чекор на човекот на Месечината. На 21 јули, во точно 2 часот и 56 минути UTC, или речиси 4 часот утрината по македонско време, Нил Армстронг ја изговори сега познатата изјава: “Ова е мал чекор за човекот, но огромен скок за човештвото”, и стапна на тлото. По него, на месечевото тло стапна и вториот астронаут, Баз Олдрин. Двајцата чекорeа по тлото на Месечината цели 2 часа и 30 минути, при што собираа примероци, поставуваа научна опрема, правеа низа експерименти. По ова следуваше полетувањето, спојувањето со бродот кој беше во орбита околу Месечината и успешното враќање дома.
Почетокот на програмата "Аполо" беше најавен во говорот на тогашниот претседател Џон Кенеди, пред американскиот Конгрес, на 25 мај 1961 година. Намерата беше испраќање луѓе на Месечината и нивно безбедно враќање на Земјата до крајот на деценијата. Говорот беше одржан само неколку недели по првиот американски лет во Земјината орбита, а неговата цел беше остварена по цели осум години.
Од 1969 до 1972 година, на Месечината слетале вкупно шест мисии Аполо: 11, 12, 14, 15, 16 и 17 со дванаесет астронаути. Аполо 7 и 9 биле летови во Земјината орбита, Аполо 8 бил лет до Месечевата орбита, Аполо 10 бил проба за спуштање на Месечината, без слетување, а спуштањето на Аполо 13 било откажано поради експлозија на резервоарот со кислород, но астронаутите преживеале и затоа оваа мисија е наречена "упешен неуспех".
Многу кратко по слетувањето, се јавија и низа теории на заговор кои тврдеа дека се работи за филмска сцена снимена во студио, којашто ја режирал легендарниот Стенли Кјубрик 
Скептицизмот е убава работа, всушност тој се наоѓа и во основата на науката. Но, како што вели латинската поговорка: Пред фактите и боговите молчат, а фактите се следни – снимки од местото на првото слетување се направени, за што пишувавме тука и тука. На нив јасно се гледаат стојниот трап на лунарниот модул и делови од опремата којашто астронаутите ја оставиле за научни експерименти, како и трагата од издувните гасови направена и останата при полетувањето назад кон Земјата. За сите останати тези и факти, може да се информирате во написот “Луѓе на месечината - лага или подвиг?” објавен во ЕМИТЕР 9/2004.
Дел од тренингот на Армстронг и Олдрин
Дел од тренингот на Армстронг и Олдрин
Лансирањето на мисијата Аполо 11
Одвојувањето на лунарниот од командниот модул
Првата фотографија на Нил Армстронг направена од површината на Месечината
Баз Олдрин се симнува по скалите на лунарниот модул
Отисок на стапало во правот на Месечината