Требаше да поминат 100 години за да дојде до првата значајна промена на тронот на звучните репродуктори. И додека CD плеерот и сребреникавиот диск сè уште не се раскомотиле на тронот од кој, по нивното вековно неприкосновено владеење, скоро преку ноќ, ги симнаа грамофонот и винилната плоча, низ заглушувачките овации и бурниот аплауз за новиот месија сè погласно се пробиваат повици на тогаш сè уште малкубројните незадоволници: "Кралот е мртов, да живее кралот!".

Ако досега ви се здодал едноличниот тон кој го генерира вашиот телефонски апарат, проследете го следниот текст во кој ќе наидете на едно многу едноставно решение на овој проблем. Овде е претставен уред кој има улога да произведе двотонски сигнал кога на телефонската линија има сигнал на ѕвонење. Покрај тоа во одредени граници можете по своја желба да го менувате генерираниот сигнал како што вас ви одговара.

Во овој број се занимаваме со темата "Каталошки податоци за транзисторите". Притоа ги разгледуваме 1. универзалните биполарни транзистори, биполарните транзистори, униполарните транзистори и едноспојните транзистори. Освен ова ја разгледуваме и можната замена на транзистори.

Многумина од вас веќе помислија дека се работи за уште еден разбркувач на комарци, но за разлика од сите претходни ова е коло кое се однесува како вистински комарец. Штом ќе се стемни тој почнува да зуи со оној познат звук кој ве излудува. Штом ќе се запали светлото зуењето исчезнува па пронаоѓањето на овој мал палавко и не е баш лесна работа. Сега можете да се пошегувате со сите оние кои ви "згрешиле" и да зборувате за комарците со насмевка на лицето.

Пред неполна година (ЕМИТЕР 1/99) во заклучокот на проектот "Бафер засилувач XX-D" напишав дека реализираниот "лампаш"ги исполни моите очекувања (и на читателите, се надевам), а единствената забелешка од аудиофилите кои го тестираа прототипот беше малиот недостаток на детали и дефиниција. Тогаш ветив (...што ми требаше...) дека ќе направам подобар модел. Ветување си е ветување - почнав со подготовките за XX-D SE (Special Edition).

Во овој и следните неколку броеви на ЕМИТЕР ќе бидат изложени повеќе или помалку познати елементи поврзани со вечната тема на заземјувањето и меѓусебното поврзување на аудио уредите во една комплетна инсталација што треба непречено да работи без оглед на бројот на уредите што се користат при која било конфигурација.