Секогаш е предизвик, кога пред себе имате задача која изгледа невозможна, да дадете сè од себе и да ја завршите независно од потешкотиите кои се дел од неа. Успехот од ваквиот потфат е секогаш позначаен од оној до кој се доаѓа лесно, но често вкусот на ваквиот успех знае да биде по малку горчлив, секогаш потсетувајќи ве на маката со која е дојдено до него. Секогаш кога ќе се зафатите со испробување на некој нов уред, независно од неговата природа и намена, предизвикот е голем, желбата исто така, но и покрај сета љубов, внимание и знаење, не секогаш се случува да бидете наградени за тоа (како во случајот со Korato One.5, на пример). Сепак, од сите аудио компоненти, звучничките системи се најделикатни, и неретко се случува да претставуваат вистинска ноќна мора. На мое потполно задоволство ова никако не би можело да се каже за малечката Револуција на Tannoy.