Со развојот на воздухопловното моделарство, паралелно се развиваше, но со побрзо темпо и радио техниката. Временскиот период од кога се користени првите уреди со ламби, па до појавата на транзисторската техника и техниката на изработка со интегрални кола е релативно краток. Овој брз напредок овозможи да се користи пропорционалниот систем за далечинско управување, кој се карактеризира со тоа што извршувањето на командата на серво моторот, е пропорционално по големина и брзина со движењето на командата палка на предавателот. Начинот на вградување и сите технички решенија во врска со тоа, имаат големо значење во поглед на функционалноста и безбедноста на РУ Моделот во целина.