Популарниот Теслин трансформатор за генерирање на високофреквентни и високонапонски електрични осцилации е феноменален пронајдок од времето кога сé уште не беше пронајдена електронската цевка како засилувач и осцилатор. Тој и денес ги возбудува чувствата на конструкторите-аматери, кои би сакале да експериментираат со него. Им излегуваме во пресрет со објавување на овој напис за самоградба на мини-модел на таков трансформатор, кој, иако во многу намалена верзија, продуцира импресивна слика на електрични празнења и безжично напојување на флуоросцентни светилки. Конструкцијата е едноставна, а материјалот е широко достапен.