Мал е бројот на апликации кои можат да се пофалат со тоа дека не само што немаат вистинска конкуренција на пазарот, туку и дека софтвер кој може да им конкурира и да ги симне од „тронот", воопшто и не постои. Тоа е случајот со Macromedia Flash или Adobe Flash, како милувате. За оние кои не знаат тоа е таа апликација со чија помош се изработуваат оние интересни анимации и кратки клипови кои ја зголемуваат интерактивноста на веб страниците. Сепак, цената на професионалната верзија која изнесува 699 "зелени банкноти", ја прави истата скапа и недостапна за повеќето корисници. Со претставувањето на осмата верзија на Flash, Macromedia (компанија која во меѓувреме стана сопственост на Adobe) за прв пат понуди и основна верзија на својот производ, чија цена е поприфатлива, се разбира, за сметка на намалените функционалности.