Во далечната 1990 година во списанието Maplin Magazine беше објавен проект на аудиозасилувач со комплементарниот транзисторски пар 2SK135/2SJ50 во излезниот степен. Засилувачот не беше дизајниран за врвни Hi-Fi достигнувања, туку идејата на проектот беше да се добие едноставен засилувач со добри перформанси кој без проблем би можел секој да го изработи. Веднаш го изработив и се уверив во точноста на тврдењата во списанието. Во наредните години  малку заради пријателите, малку повеќе поради пријателите внесов неколку измени без да го нарушам основниот концепт според кој е дизајнирана оригиналната конфигурација. Овој пат целта беше да се добие квалитетен но поевтин засилувач, кој со добри звучни кутии би ги задоволил вкусовите и на најпробирливите аудиофили. Затоа го заменив скапиот и редок транзисторски пар во излезниот степен со далеку поевтината комбинација IRF640/IRF9640, а додадов и коло за ограничување на струјата низ излезните транзистори, како и коло за заштита од куса врска на излезот. Сето тоа, заедно со уште неколку измени го сочинува овој проект.

Пред да започнете со изработка на овој засилувач добро проучете го целиот текст, како и текстот во рамката “Информации и упатства за електроничарите”. Во ЕМИТЕР досега се објавени неколку проекти на транзисторски аудиозасилувачи. Ви препорачувам сите да ги проучите. Во секој ќе најдете по некоја корисна информација која ќе ви овозможи полесно да го реализирате овој проект. Потоа од ППК сервисот на ЕМИТЕР набавете ја плочката со печатено коло, а компонентите наведени во пописот на потребен материјал набавете ги во најблиската продавница за електронски материјали.