Борбата за освојување на пазарот во речиси сите области од светот на информатиката и информатичката технологија е сосема вообичаена појава. Сведоци сме на многу вакви "натпревари", каде се води беспоштедна борба за превласт. Сепак, ретки се областите каде производот на една компанија има толку голема предност во однос на конкурентите, како што е случајот кај интернет-пребарувачите (Web Browser). Според податоци добиени од разни извори, Internet Explorer е сé уште убедливо најмногу користен интернет-пребарувач на планетава. Останува отворено прашањето дали овој програм е навистина подобар од конкуренцијата или причината за неговата застапеност лежи во фактот што е интегриран дел на Windows оперативните системи, за чија застапеност кај десктоп системите верувам дека не е потребно да се зборува.