Во текот на 70-тите години од минатиот век, Франција и З. Германија, внимателно следејќи го развојот и употребата на моќните специјализирани борбено-оклопени хеликоптери од американско производство AH-1 Cobra и AH-64 Apache, заклучија дека лесните неоклопени хеликоптери Gazelle (на Франција) и Bo105 (на Германија), иако се приспособени за противтенковска борба, во иднина не ќе можат да одговорат на нивните потреби. Поради овие причини, двете држави заклучија дека треба да започнат развој на нов "чистокрвен" борбен хеликоптер, кој би се користел за противоклопна борба, борба со други хеликоптери и за непосредна поддршка. Благодарејки на сличните размислувања за развојот на идниот борбен хеликоптер, Франција и Германија во 1984 година ги здружуваат своите сили со потпишување на меморандум за заеднички вложувања во развој на нов борбен хеликоптер. Во оваа програма Франција е застапена со компанијата Aerospatiale, а Германија со компанијата MBB (Messershmitt - Boelkov - Bloham). За полесно функционирање на развојната програма и понатамошно производство, двете компании на 18 септември 1985 година ја создаваат заедничката компанија Eurocopter Tiger GmbH.
При развојот на новиот хеликоптер се водело сметка да поседува големи борбени можности и способност за борбено дејство во сите временски услови, преку ноќ и ден, а воедно да поседува и одредени стелт карактеристики. Откако е дефиниран конечниот дизајн, на 30 ноември 1989 година од Eurocopter се порачани 5 прототипови, а воедно новиот борбен хеликоптер е крстен со името Tigar...