Зошто е значаен Тојота Приус? Затоа што го покажа патот по кој треба да оди автомобилската индустрија од аспект на погонот во ова време на светска енергетска криза и очекуван крај на резервите на фосилни горива, па нека биде тоа и некое преодно решение. Потоа извонредно значајно е што ја задвижи индустријата за производство на електромотори и електронската индустрија за управувачките и контролни единици за тие електромотори и воопшто погонскиот систем, и затоа што веќе се прават огромни напори за решавање на проблемите со складирање на електричната енергија во батерии (акумулатори) или ултракондензатори, т.е. наголемување на нивната севкупна ефикасност (поголема густина и што е можно побрз проток на енергијата во нив). При ова слободно може да се каже дека се вложува во иднината, т.е. дека иднината на автомобилскиот превоз најверојатно би припаднала на електромобилот. За електромобилот поопширно ќе пишуваме во неколку наредни броеви, а сега да ја проследиме приказната за Тојота Приус - неговиот развој и употребените технички решенија.