Веројатно една од најнеблагодарните работи, кои некогаш сте ги правеле, а верувајте дека и во иднина ќе ги правите, е чистење на бојлерот од бигор. Во основа некако сте се снашле со малото бојлерче во кујната, но само еден поглед кон оној од купатилото кажува сè. Треба да го демонтирате, расклопите, исчистите, склопите и монтирате. Колку едноставно звучи тоа!?! Решението можете да го побарате во купување на електричен омекнувач на водата. Иако, најчесто е скоро невозможно да дојдете до него, а за цената воопшто и да не зборуваме. Како и сите гореспоменати, и членовите на нашата редакција се судрија со истиот проблем. Едноставното решение, за кое ви зборувавме погоре, се наметна како единствено и уредот беше набавен. Сè си дојде на своето место, но ЕМИТЕР не би бил тоа што е ако не бевме доволно љубопитни да ѕирнеме под поврината. Едноставно се заинтересиравме за принципот на работа и она што уредот го дава на својот излез. Верувале или не, колото кое ви го претставуваме, а кое патем речено не е никаков посебен трошок за семејниот буџет, го прави истото што и фабричките.