Една од најтешките работи при изработка на ППК, мора да признаеме ние електроничарите, е дупчењето на самата ППК. Имено тоа и мене ми претставуваше најголема тешкотија - многу издупчени дупки онаму каде не им е местото, искршени бургии и искинати и оштетени фолии. Оваа макотрпна работа ме пратеше до пред 6-7 години, кога со изработката на оваа дупчалка ставив крај на сите тешкотии. Пред тоа ги поминав сите фази низ кои повеќето постари електроничари поминале - првата плочка (некаде на почетокот на '80-тите) ја издупчив со наострена челична жица, по неколку години купив моделарска дупчалка од "Механика" - Изола, а потоа неколку години ја користев големата столбна дупчалка во фирмата каде што работам. Баш таа индустриска столбна дупчалка ми даде идеја да изработам минијатурна дупчалка која ќе работи по аналогија на неа, но која ќе служи исклучиво за дупчење на ППК.