До оштетување на звучниците може да дојде на различни начини. Излезниот нискофреквентен сигнал од засилувачот може толку да порасне што ќе ја надмине декларираната моќност на звучникот која во практиката многу често е помала од наведената. Од друга страна, на излезот од засилувачот, поради некој дефект во самиот засилувач, може да се појави голем еднонасочен напон, па од еднонасочната струја да прегори движечката намотка на звучникот. Овде опишаната електронска заштита делува и во двата случаи. Посебна поволност при користење на оваа заштита е тоа што не мора да се отвораат веќе изградените засилувачи и да се бара соодветен напон за напојување на заштитата. Заштитата не бара посебен извор за напојување (се користи нискофреквентиот сигнал од засилувачот), а ги штити звучниците со моќност до околу 1500 W. Заштитата не влијае на квалитетот на репродукцијата и може да се користи во HI-FI уредите.