Плочките со печатени кола (ППК) во електрониката се користат уште од времето на електронските цевки (лампи). Со појавата на транзисторите и интегрираните кола примената на печатените врски достигнува најголем подем.
Во стручната литература и во разни списанија од областа на електрониката, објавени се написи за изработка на ППК со фото, сито и други постапки. Со брзиот технолошки развој на микросметачите (компјутерите), и нивната периферна опрема, се олеснија работите околу дизајнирањето, а и самото печатење со нанесување тонер на кашираниот пертинакс, со посредство на соодветна фолија за ласерски печатар, и понатамошна термо постапка. Сите овие постапки бараат соодветни услови, средства и скапа апаратура што за аматерска потреба, а посебно за почетниците, претставува "тврд орев".